[A:༥༤]ཧོར་གྱི་དགེ་སློང་ཤནྟི་རཀྵི་སྤྱན་དྲོངས་ཤིག་ཅེས་ཟེར་བ་ཡིད་ལ་བཟུང་ནས་ཧྭ་ཤང་གཅིག་ཁྲིད་ནས་བོད་དུ་འོངས་པ་ན། མ་ཞང་སོགས་ཀྱིས་རྒྱལ་པོ་སྐུ་ཚེ་ཐུང་བ་དང་བཀྲ་མི་ཤིས་པ་ཆོས་ཀྱིས་ལན་པས་ཆོས་བྱར་མེད་པའི་ཁྲིམས་བཅས་ཏེ། ཤཱཀྱ་མུ་ནི་རྒྱ་ཡུལ་དུ་སྐྱེལ་བའི་ཐབས་བྱས་ཀྱང་མ་ཐེག་པར་ས་འོག་ཏུ་སྦས། འཕྲུལ་སྣང་དུ་བཤས་ར་བྱས། དུས་དེར་སྣ་རྣམ་ཁྲི་ཐོག་རྗེ་ཐང་ལྷ་འབར་བྱ་བ་རྒྱལ་བས། ལྕོག་རོ་སྐྱེས་བཟང་རྒྱལ་མགོ་བྱད་བསྐམས་ནས་ཤི་བས། ལྟས་མཁན་དང་མི་ཕལ་ཆེར་གྱིས་ལྷ་ས་འོག་ཏུ་སྦས་པས་ལན་ཟེར་བས། སྐྱིད་གྲོང་དུ་བསྐྱལ། བྲག་དམར་མགྲིན་བཟང་བཤིག་འདུག་པས། སང་ཤིས་རྒྱའི་གླེགས་བམ་རྣམས་མཆིམ་ཕུའི་རྫ་ལ་སྦས། ཧྭ་ཤང་སློག་སྐབས་དེར་སྦ་གསལ་སྣང་གི་བུ་མོ་ཤི་བ། ཧྭ་ཤང་གིས་རོའི་ཁར་མུ་ཏིག་མཚལ་གྱིས་བྱུགས་པའི་མཚན་མ་བྱས་བཅུག་ནས་མའི་མལ་འོག་ཏུ་སྦས། བུ་མོ་མའི་བུར་སྐྱེ་བའི་ལུང་བསྟན་པ་བཞིན་བཙས་པའི་སྐབས་སུ་ཁ་ན་མུ་ཏིག་བྱུང་བས། ཚེ་ཕྱི་མ་ཡོད་པའི་ངེས་པ་རྙེད་ནས། གསལ་སྣང་ཆོས་ཀྱི་ཆེད་དུ་ལྷོ་བལ་དུ་འགྲོ་བར་རྗེ་ལ་གསོལ་པས་མང་ཡུལ་གྱི་ཁང་དཔོན་དུ་བརྫངས། སྦ་བཞེད་དུ། གསལ་སྣང་མང་ཡུལ་དུ་སོང་བའི་རྗེས་སུ་སང་ཤི་རྒྱ་ནག་ནས་འཁོར་བར་བཤད་འདུག་པ་དང་། དཔའ་བོ་གཙུག་ལག་ཀྱང་དེའི་རྗེས་སུ་འབྲངས་ནའང་། གོང་འོག་ཚིག་གི་འགལ་འདུ་ཡོད་མེད་མ་བརྟགས་པའི་བབ་ཅོལ་ཏེ། ཧྭ་ཤང་ནི་རྒྱའི་ཆོས་སྟོན་པའི་སློབ་དཔོན་ཡིན་ཞིང་། ཆོས་ཁྲིམས་བཤིག་པའི་དོན་གྱིས་ར་མོ་ཆེའི་ཧྭ་ཤང་སོགས་བོད་ན་ཡོད་པ་ཀུན་ཕྱིར་བསྐྲད་ཟིན། གསལ་སྣང་གི་བུ་མོ་བུར་སྐྱེ་བའི་ལུང་བསྟན་བྱེད་པ་པོ་དེ་སང་ཤིས་གསར་དུ་ཁྲིད་ཡོངས་པའི་ཧྭ་ཤང་དེར་ངོས་འཛིན་དགོས་པས། སྙིགས་དུས་ཀྱི་མཁས་པ་ཀུན་གྱི་གཙུག་གི་ནོར་བུ་གཞོན་ནུ་དཔལ་བའི་དེབ་སྔོན་དང་། ཤེས་བྱ་ཀུན་ལ་གཟིགས་པའི་སྤྱན་ལྡན་སྤྲུལ་སྐུ་ངག་དབང་ནོར་བུའི་ཆོས་འབྱུང་བསྟན་པའི་པདྨ་རྒྱས་པའི་ཉིན་བྱེད་དུ།