[A:༥༥]སང་ཤི་བོད་དུ་སླེབ་ནས་གསལ་སྣང་སྟོད་དུ་སོང་བའི་གོ་རིམ་མཛད་པ་འདི་འཐད་དོ༎
མི་རིང་བར་རྒྱལ་བུ་སྐུ་ནར་སོན་ཏེ། མེས་རྣམས་ཀྱི་ཡིག་ཚང་གཟིགས་པས་ཆོས་མཛད་པར་དགོངས་པའི་གཏམ་མཛད་པས་སང་ཤིས་སྔར་ཧྭ་ཤང་གིས་ལུང་བསྟན་པའི་དུས་དེར་གོ་ནས་གླེགས་བམ་རྣམས་རྫ་ཁྲོད་ནས་བླངས་ཏེ། དགེ་བ་བཅུའི་མདོ། རྡོ་གཅོད། ས་ལུ་ལྗང་པ་རྣམས་གཟིགས་སུ་ཕུལ་བས་ལྟ་སྤྱོད་དག་ཅིང་ཟུང་དུ་འབྲེལ་བར་གོ་ནས་དད་དེ། རྒྱ་མེ་མགོ་དང་ཁ་ཆེ་ཨ་ནནྟས་སྐད་འགྱུར་བྱས་པས་མ་ཞང་སོགས་ཀྱིས་བཀག་ཆོས་བློན་རྣམས་ཀྱི་སང་ཤི་སྟོད་དུ་བརྫངས། གསལ་སྣང་གིས་བྱང་ཆུབ་ཆེན་པོ་དང་། ན་ལེནྡྲར་མཆོད་པ་བྱས། མཁན་པོ་རིན་པོ་ཆེ་དང་མཇལ་ཏེ་མང་ཡུལ་དུ་སྤྱན་དྲངས། གསལ་སྣང་གིས་བཙད་པོའི་དྲུང་དུ་འོངས་ནས་མཁན་པོའི་གསུང་དང་རྒྱུ་མཚན་རྒྱལ་པོར་གསོལ། མ་ཞང་གི་ཆད་པ་བྱུང་དོགས་ནས་གསལ་སྣང་ཡིབས་སུ་བཅུག་བཙད་པོས་ལྐོག་ཏུ་འགོས་རྒན་སོགས་ཆོས་བློན་རྣམས་དང་དཀའ་བགྲོས་ནས། མོ་རྩིས་པ་སོགས་ལུང་བསྟན་མཁན་པོ་རྣམས་ལ་བྱ་དགའ་བྱིན་ཏེ། རྒྱལ་པོ་རྒྱལ་སྲིད་དང་བཅས་པ་ལ་ཆགས་ཆེན་པོ་བདོག་པས། དེའི་རིམ་གྲོར་བློན་པོ་ཆེ་བ་ཞིག་ཟླ་བ་གསུམ་གྱི་བར་ལ་དུར་དུ་འཇུག་དགོས་པར་བསྒྲག་ཏུ་བཅུག་སྟེ། འགོས་ཀྱི་རྐང་པ་ལ་བྱ་རྒོད་ཀྱི་ལྷམ་གོན་པ་སོགས་ཐབས་འཕྲུལ་དུ་མས་མ་ཞང་དང་ལྷན་ཅིག་པར་དུར་ནང་དུ་ཕྱིན་ནས་ཕྱིར་བྲོས་པས་མ་ཞང་གིས་བསྙབས་ཀྱང་རྒོད་སྤུ་སྙིམ་པ་གང་ལས་མ་བྱུང་། དེ་མ་ཐག་དོང་ཁ་བཅད་དེ། རྗེ་བློན་ཀུན་ཆོས་བྱེད་པའི་ཆད་སོ་བྱས།
དེ་ནས་རིགས་ཀྱིས་མངོན་པར་མཐོ་བ་ཟ་ཧོར་རྒྱལ་པོའི་གདུང་ལས་འཁྲུངས་ཤིང་། ཇི་ལྟ་བ་དང་ཇི་སྙེད་པའི་ཆོས་ཀྱི་བརྒྱུད་གནས་ལྔ་རིག་པའི་ཉག་ཕྲན་གྱིས་བཀུག་པའི་མཁས་པ་མཐའ་དག་གི་བླ་ན་མཐོ་བ་རྣམ་པར་དག་