[A:༥༦]པའི་ཚུལ་ཁྲིམས་དྲི་མ་མེད་པའི་མ་ལ་ཡའི་རླུང་བཞོན་གྱིས་སྡོམ་བརྩོན་གཉིས་འཐུང་གི་ཚོགས་ལ་དགའ་མགུར་སྤྱོད་པའི་དཔལ་སྟེར་བ། བདེ་སྟོང་ཟུང་དུ་འཇུག་པའི་ཡེ་ཤེས་མངོན་དུ་མཛད་པའི་གྲགས་སྙན་ཀརྞི་ཀའི་ཅོད་པན་ཕྱོགས་ཀྱི་འགྲམ་པར་འགོད་པའི་མཁན་པོ་རིན་པོ་ཆེ་བོ་དྷི་ས་ཏྭ་སྤྱན་འདྲེན་པའི་ཕོ་ཉར་གསལ་སྣང་བརྫངས་པ་བཞིན་རིམ་གྱིས་ཕེབས་ཏེ། འོམ་བུ་ཚལ་དུ་མཇལ། མཁན་པོས་རྒྱལ་པོ་ལ་དགེ་བ་བཅུ་དང་ཁམས་བཅོ་བརྒྱད་ལ་སོགས་པའི་ཆོས་མང་པོ་བཤད་པས། བོད་ཀྱི་ལྷ་སྲིན་རྣམས་ཁྲོས་ནས་དམར་པོ་རིའི་ཕོ་བྲང་ལ་ཐོག་བརྒྱབ། ལོ་ཉེས་དང་མི་ཕྱུགས་ལ་ནད་ཆེན་པོ་བྱུང་བས། སྡིག་བློན་རྣམས་ཀྱིས་འགོ་བྱས་པའི་བོད་འབངས་ཕལ་ཆེར་གྱིས་ཆོས་བྱས་པས་ལན་ཟེར་ནས་མི་དགའ་བ་བྱས་པས། བཙད་པོས་རྒྱུ་མཚན་མཁན་པོའི་སྙན་དུ་གསོལ་པ་ལ། མཁན་པོས་ཡབ་མེས་ཀྱི་རིང་ལ་གཙུག་ལག་ཁང་རྟེན་དང་བརྟེན་པར་བཅས་པ་བཞེང་བ། ཆོས་བསྒྱུར་བ་སོགས་མཛད་ནའང་། ལྷ་སྲིན་རྣམས་མ་བཏུལ་བས། བཙན་པོ་འགའ་ཞིག་གི་སྐུ་ཚེ་ལ་བར་ཆད་དང་། ཆོས་ལ་སྐེད་ཉག་སོགས་སྐྱོན་འགའ་ཞིག་བྱུང་འདུག་པས། ས་གཞི་འདི་དག་དྲག་པོས་འདུལ་བའི་ཆེད་དུ། ཨོ་རྒྱན་གྱི་སློབ་དཔོན་པདྨ་འབྱུང་གནས་ཞེས་བྱ་བ་འཛམ་བུ་གླིང་ན་ཆེ་བའི་རིགས་སྔགས་མཁན་ཞིག་ཡོད་པ་དེ། རྒྱལ་པོ་ཉིད་དང་སྔོན་མཆོད་རྟེན་བྱ་རུང་ཁ་ཤོར་བཞེང་བའི་དུས་སུ་སྨོན་ལམ་གྱིས་འབྲེལ་བ་ཡོད་པས་སྤྱན་དྲངས་ན། བཙད་པོའི་རྣམ་པར་དཀར་བའི་ཐུགས་ཀྱི་བཞེད་པ་མཐའ་དག་འགྲུབ་པར་ལུང་བསྟན་ནས། མཁན་པོས་བལ་པོར་བྱོན། དེ་ནས་སླར་བཙན་པོས་ཐབས་ལ་མཁས་པའི་མཛད་པས་འབངས་མཐའ་དག་ཆོས་བྱ་བར་ཁས་བླངས། མཁན་པོས་ལུང་བསྟན་པ་དེ་རྨི་ལམ་དུ་བྱུང་བ་ལྟར་མཛད་ནས། སངས་རྒྱས་སྣང་བ་མཐའ་ཡས་ཀྱི་ཡེ་ཤེས་མཆོག་གི་ཟློས་གར་ལས་སིན་དྷུ་རྒྱ་མཚོའི་གླིང་དུ་སྐུ་འཁྲུངས་ཤིང་འཆི་མེད་ཚེའི་རིགས་འཛིན་དང་ཕྱག་རྒྱ་ཆེན་པོ་མཆོག་གི་དངོས་