[A:༥༧]གྲུབ་བརྙེས་པ། དུས་གསུམ་ཅིག་ཅར་དུ་མཁྱེན་པའི་སློབ་དཔོན་ཆེན་པོ་མཚོ་ལས་སྐྱེས་པའི་རྡོ་རྗེ་སྤྱན་འདྲེན་པའི་ཕོ་ཉ་སྔ་རྟིང་དུ་བརྫངས་ཤིང་། སླར་སྣ་ནམ་རྡོ་རྗེ་བདུད་འཇོམས་སོགས་ལམ་དུ་བཤད་དྲག་པོས་རིན་པོ་ཆེའི་ཕྱག་རྟེན་དང་བཅས་ཏེ་མངགས་པས་ཕོ་ཉ་རྣམས་ངལ་ཞིང་དུབ་པ་སློབ་དཔོན་གྱིས་མཁྱེན་ནས། རྫུ་འཕྲུལ་གྱིས་མང་ཡུལ་གུང་ཐང་དུ་ཕེབས་པ་ན་མཇལ། སློབ་དཔོན་གྱིས་ཉི་ཟླ་ཐང་ལ་ཕབས་པ། ཆུ་བོ་གྱེན་ལ་བཟློག་པ་སོགས་སྐུའི་བཀོད་པའི་རྫུ་འཕྲུལ་མཐའ་ཡས་པ་བསྟན་ཏེ་ཕོ་ཉ་རྣམས་ལྡོག་ཏུ་མེད་པའི་མོས་པ་བརྟན་པོ་ཐོབ། ཕྱག་རྟེན་གྱི་གསེར་རྣམས་མངའ་རིས་ཕྱོགས་སུ་གཏོར་ཏེ། མ་འོངས་པར་བོད་དུ་གསེར་གྱི་འདོད་རྒུ་འབྱུང་བའི་རྟེན་འབྲེལ་མཛད། དེ་ནས་རིམ་གྱིས་ལམ་དུ་ཞུགས་ཏེ་ཕེབས་པ་ན། བོད་ཀྱི་ལྷ་འདྲེ་སྟོབས་པོ་ཆེ་ཕལ་ཆེ་བས་གོ་མཚམས་པར། གསང་བ་གསུམ་གྱི་མཐའ་ཀླས་པའི་ནུས་མཐུས་སྲོག་གི་སྙིང་པོ་བླངས་ནས་དམ་ལ་བཏགས། སྟོད་ལུང་གཞོང་པ་མདའ་རུ་ཕེབས་པ་ན། ལྷ་བཟང་ཀླུ་དཔལ་སོགས་བློན་པོ་རྣམས་ཀྱིས་བསུ་བ་དང་མཇལ་ནས་དྲོ་འདེབས་པར་ཆུ་མེད་པ་ལ་སློབ་དཔོན་གྱི་ཕྱག་འཁར་བཏབ་པས་ཉལ་འགྲོའི་རྒྱུན་བབས་པ། གཞོང་པ་ལྷ་ཆུ་གྲགས། དེ་ནས་མངའ་བདག་རྒྱལ་པོ་འཁོར་བཅས་བསུ་བའི་བཀོད་པ་རྒྱ་ཆེན་པོ་དང་བཅས་ཏེ་མཇལ་ནས་བྲག་དམར་མགྲིན་བཟང་དུ་བཞུགས། སླར་མཁན་པོ་གདན་འདྲེན་གྱི་ཕོ་ཉ་བ་མངགས་ཏེ་ཕེབས། དུས་དེར་རྗེ་བློན་གཙུག་ལག་ཁང་རྩིག་པའི་བཀའ་བགྲོས་ནས་འབངས་རྣམས་བསགས་ཏེ། ཞང་པོ་རྒྱའི་ཡུལ་མཐོང་བའི་མཁར་ཞིག་རྩིག་གམ། ཤེལ་གྱི་མཆོད་རྟེན་ཤར་རི་དང་མཉམ་པ་ཞིག་རྩིག་གམ། གཙང་པོ་སྦུབས་སུ་འཇུག་གམ། ལྷ་ཁང་བྲེ་ཚད་ཙམ་ཞིག་རྩིག་གམ། ཞེས་འདམ་ཀ་བཏང་བས་གཞན་རྣམས་བློའི་ཡུལ་ལས་འདས་ཏེ་ལྷ་ཁང་རྩིག་པར་ཁ་འཆམ། ཤཱཀྱ་མུ་ནི་མང་ཡུལ་ནས་གདན་དྲངས་ཏེ་འཕྲུལ་སྣང་གཙུགས་ལག་ཁང་དུ་བཞུགས་དུ་བཅུག། སློབ་དཔོན་