[A:༥༩]ཁྱོད་ལ་རྔན་པར་བྱིན་ནོ་ཟེར་བས། ལྕེ་དར་ཤམ་ཙམ་པ་ལན་གཉིས་སུ་བྱུང་ཡང་མ་ཟིན། དེར་མུ་སྟེགས་ཀྱིས། རོ་ལན་ཅིག་འོང་བ་དེ་མ་ཟིན་ན། ངེད་རང་གཉིས་ཀྱིས་འགོ་བྱས་པའི་སྲིད་པ་གསུམ་གྱི་སེམས་ཅན་གསོད་པས་སྒྲིམས་ཤིག་ཟེར་བ་དང་། ལྕེ་སོས་བཟུང་ནས་བཅད་པ་རལ་གྲིར་གྱུར་པ་དགེ་ཚུལ་གྱིས་ནམ་མཁའ་ལ་དབྱུགས་ནས་རི་རབ་ཀྱི་ཁར་ཕྱིན། གླིང་བཞི་གླིང་ཕྲན་ལྕོག་དང་བཅས་པ་ལེགས་པར་བལྟས་ནས་སླར་མུ་སྟེགས་ལ་གཏད། རོ་གསེར་དུ་གྱུར་པས་ཡོ་བྱད་བྱས་ནས། རི་རབ་གླིང་བཞི་གླིང་ཕྲན་དང་བཅས་པ་ལ་དཔེ་བྱས་ནས་བཞེངས་པ་ཨོ་ཏནྟ་པུ་རིའི་གཙུག་ལག་ཁང་ཞེས་བྱ་བ་ཡ་མཚན་ཅན་ཞིག་ཡོད་པས། དེ་ལ་དཔེ་བྱ་བར་གསུངས་ཏེ། དགེ་བྱེད་ཅེས་པ་ཆུ་ཕོ་སྟག་གི་ལོ་ལ་བསིལ་ལྡན་ཁ་བས་བསྐོར་བའི་དོ་རར་འཁོད་པའི་ལུས་ཅན་ཀུན་གྱི་བསོད་ནམས་ཀྱི་ཞིང་རླབས་པོ་ཆེར་གྱུར་པ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་རྨང་བཏིངས། རྒྱ་ཁྱོན་གྱི་ཚད། བཙད་པོ་རང་གི་མདའ་རྒྱང་གང་བྱ་བར་གསུངས་པས། བློན་པོ་རྣམས་ཀྱིས་ལྐོག་ཏུ་བགྲོས་ཏེ། རྗེའི་མདའ་རྒྱང་གང་ལ་གཞན་གྱི་གསུམ་ཡོང་བས་དེ་ཙམ་མི་འགྲུབ་ཅིང་། བཀའ་བཅག་པ་ཡང་མི་རིགས་པས་ཐབས་ཤིག་བྱེད་པར་མཐུན་ཏེ། མདའི་སྨྱུག་སྦུགས་སུ་དངུལ་ཆུ་བླུག་པས་གཞན་གྱི་མདའ་རྒྱང་གང་དང་མཉམ་པ་བྱུང་ལ། དེ་ཡང་དབུ་རྩེ་རི་རབ་གླིང་བཞི་གླིང་ཕྲན་བརྒྱད། ཡཀྴ་གོང་འོག་ཉི་ཟླ། མཐར་ལྕགས་རི། ཟུར་བཞིར་མཆོད་རྟེན། སྒོ་བཞིར་རྡོ་རིང་ཁྱད་པར་ཇོ་མོའི་གླིང་གསུམ་དང་བཅས་པ། སློབ་དཔོན་གྱིས་དྲེགས་པ་ཅན་ཐམས་ཅད་ལས་ལ་བཀོལ་བས་ཉིན་མིས་བརྩིགས་པ་བས། མཚན་ལྷ་འདྲེས་བརྩིགས་པ་མཐོ་བར་གྱུར། དུས་དེར་རྒྱལ་པོའི་མནལ་ལམ་དུ་ཧས་པོ་རིའི་རྩེར་བྱོན་པས་ཤཱཀྱ་ཐུབ་པ་གཙོ་འཁོར་དགུ་སངས་རྒྱས་དངོས་ཀྱིས་བྱིན་གྱིས་བརླབས་པ་འདུག་པ་གཟིགས་པས་དགྱེས་པའི་རྣམ་འགྱུར་མཛད་པའི་ངང་ལ་མནལ་སད་དེ། ནང་