[A:༦༠]པར་བློན་པོ་ཁམས་པ་གོ་ཆ་ཁྲིད་ནས་གཟིགས་པར་བྱོན་པས། བྱེ་མའི་འོག་ནས་རྡོ་སྐུ་རང་བྱུང་ཐོན་ཏེ་གཙང་ཁང་དུ་སྤྱན་དྲངས་པས་ས་གཡོས་པ་སོགས་ལྟས་ཁྱད་པར་ཅན་བྱུང་བའི། ཇོ་བོ་བྱང་ཆུབ་ཆེན་པོ་ནང་རྟེན་དུ་བཞུགས་པའི་མ་ཧཱ་བོ་དྷིས་ཐོག་དྲངས། འོག་ཁང་བར་ཁང་སྟེང་ཁང་འཁོར་ས་བར་མ་དང་ཆེན་མོ། གླིང་གཞན་རྣམས་ཀྱི་བདེ་གཤེགས་ཞི་ཁྲོ་འཁོར་དང་བཅས་པའི་སྐུའི་སྣང་བརྙན་ཐམས་ཅད་འདྲེན་བྱེད་ཀྱི་དགའ་སྟོན་རྨད་དུ་བྱུང་བའི་ཟིལ་མངར་དུ་གྱུར། ཁྱད་པར་མཆོད་རྟེན་དཀར་པོར་མ་ག་དྷའི་རྒྱལ་པོའི་སྒོ་མདུན་གྱི་རིན་པོ་ཆེའི་བུམ་པ་ནས་བླངས་པའི་བདེ་བར་གཤེགས་པའི་གདུང་རིང་བསྲེལ་དང་། མེས་ཀྱི་གཉན་པོ་གསང་བ་དང་མདོ་ལྔ་བཞུགས་པས་བྱིན་རླབས་མཆོག་ཏུ་ཆེ་བར་གྲགས་ཤིང་། འགྲོ་བཟའ་ཁྲི་རྒྱལ་མང་མགོ་བཙུན་གྱིས་དགེ་རྒྱས་ཀྱི་ལྷ་ཁང་ལ། ཕ་མིང་ཐག་རིང་ཞིང་སྲས་མེད་པས། ཞིག་གསོས་དང་མཆོད་པ་འབྱུང་བར་དཀའ་བར་བསམས་ཏེ། རྩིག་པ་སོ་ཕག་ལ་ཞ་ཉེའི་ཆུ་སྦྱར། ཟངས་ཀྱི་ཐོག་བཀབ། མཆོད་པར་རོལ་མོར་ཅོང་བཏགས། མར་མེར་རིན་པོ་ཆེ་མརྒད་སྐུ་གཟུགས་ཀྱི་དཔྲལ་བར་བཏབ་ཟེར། ཕོ་ཡོང་བཟས་བུ་ཚལ་གསེར་ཁང་ལོགས་ལ་རྩིག་པ་མེད་པ། ནང་ན་ཀ་བ་མེད་པ་སོགས་བཟོ་སྣ་བཅུ་གསུམ་གྱིས་ཁྱད་པར་དུ་འཕགས་སྐད། དེ་ཡང་ལོ་རྒྱུས་སྨྲ་ལ་ཟླ་མེད་དཔལ་ཡེ་བཟང་རྩེ་བས། རྒྱལ་པོའི་འཁྲུངས་ལོ་གསལ་བར་མ་མཛད་འདུག་ཅིང་། མཁས་པའི་དབང་པོ་བུ་སྟོན་རིན་པོ་ཆེ་སོགས་ས་རྟ་ལ་འཁྲུངས་པར་བཞེད་ལ། སྦ་བཞེད་དུ་རྒྱལ་པོ་ཡོས་ལ་འཁྲུངས་པའི་དགུང་ལོ་བཅུ་གསུམ་པ་ཡོས་སྟེང་དུ་གཙུག་ལག་ཁང་བརྩིགས་པར་བཤད་ནའང་། རྒྱལ་པོའི་དགུང་སྙིང་རྟ་ལོར་འདོད་པ་རྣམས་ཀྱིས་གཙུག་ལག་ཁང་ཡོས་ལ་བརྩིགས་པར་སྨྲ་བ་ཁུངས་ཆེ་བར་མ་མཐོང་ཞིང་། བློ་ཆུང་རྣམས་གཙུག་ལག་ཁང་རྒྱ་ཁྱོན་ཧ་ཅང་ཆེ་བས་ལོ་ལྔ་ཙམ་ལ་མི་བགྲུབ་སྙམ་པ་འཆར་ཡང་། དུས་དེའི་མཁན་སློབ་ཆོས་གསུམ་སོགས་དུ་མ་ཞིག་བདེ་བར་