[A:༦༥]མཐུ་ཕུལ་དུ་བྱུང་བའི་ངོ་མཚར་བའི་རྟགས་ཀྱི་གྲགས་པའི་རྣ་རྒྱན་ཕྱོགས་བྲལ་གྱི་རྣ་བའི་ལམ་དུ་དོག་པོར་འགེང་བར་མཛད་དོ། ། དེ་ནས་གཙུག་ལག་ཁང་གི་སྲུང་མར་མཁན་སློབ་ཆོས་གསུམ་བཀའ་བགྲོས་ཏེ། རྒྱལ་པོའི་དམག་གིས་བྷ་ཏ་ཧོར་གྱི་སྒོམ་གྲྭ་བཅོམ་པའི་ཀ་ཅའི་རྗེས་སུ་དཔེ་ཧར་འབྲངས་ཏེ་བྱུང་བར་དཀོར་སྲུང་བཅོལ། འགའ་ཞིག་ཏུ་མཁན་སློབ་ཆོས་གསུམ་གྱིས་ཕོ་ཉ་འཕྲིན་ཡིག་མངགས་པ་ལྟར། གཡུའི་ཐུབ་པ། བསེ་འབག་ཟ་ཧོར་རྒྱལ་རིགས་དྷརྨ་པཱ་ལ་རྣམས་ཀྱིས་སྣ་དྲངས་པའི་རྗེས་ལ་དཔེ་ཧར་བྱོན་པར་བཤད་པ་འདི་སྐྱེ་འགྲོ་རྣམས་ལ་སྨྱོ་འབོག་སོགས་འཚེ་བ་ཆེ་དྲགས་པར། སློབ་དཔོན་གྱིས་ཨར་ལ་གཏད་པས་བྷ་ཏ་ཧོར་གྱི་ཡུལ་དུ་བྲོས་པར་བཤད་པ་དང་གོ་རིམ་འགྲིག་པར་མངོན་ནོ། ། སྨྲས་པ།
མདོ་རྒྱུད་ཆོས་ཕུང་ཡན་ལག་བརྒྱད་ལྡན་ཆབ༎
མཁས་གྲུབ་ལོ་པཎ་གངས་རིའི་ཞལ་སྒོ་ལས༎
འོངས་པའི་གླེགས་བམ་དལ་འགྲོའི་མཛའ་ན་མོས༎
རྒྱལ་བསྟན་རྩ་ལག་མི་ཕྱེད་དམ་དུ་འཁྱུད༎
སྐྱོན་བྲལ་རྟེན་བཟང་རྒྱུད་ཀྱི་ཞིང་ས་ལ༎
མྱང་འདས་སེམས་ཀྱི་ས་བོན་གསོལ་བཞིའི་བརླན༎
རྣམ་པར་བཞད་པས་ཚུལ་ཁྲིམས་མྱུ་གུའི་འབྲས༎
མངོན་མཐོའི་དཔལ་ཡོན་བླ་ན་སྤེལ་བར་ཤིས༎
གསང་སྔགས་མཐུ་གྲུབ་རྗེ་འབངས་ཉེར་ལྔ་ཡི༎
བརྗོད་བྲལ་བློ་ལས་འདས་པའི་རྫུ་འཕྲུལ་གྱིས༎
འཕགས་ཡུལ་གྲུབ་པའི་དབང་ཕྱུག་དམ་པ་རྣམས༎