[A:༦༦]འབྲོག་དགོན་དབེན་པའི་གནས་སུ་ཡིབས་སམ་སྙམ༎
རེ་ཞིག་ནས་རྒྱའི་ཧྭ་ཤང་མ་ཧྭ་ཡ་ན་བོད་དུ་འོངས་ཏེ། ལུས་ངག་གི་དགེ་བ་བྱས་པས་འཚང་མི་རྒྱ། ཅི་ཡང་ཡིད་ལ་མི་བྱེད་པས་འཚང་རྒྱ་ཟེར་ནས་སྒོམ་བསླབས་པས་བོད་འབངས་མང་པོ་ལོག་པའི་ལམ་ལ་ཁྲིད། བཙན་པོ་ཡང་བཀས་བཅད་དཀའ་བར་གྱུར་ཀྱང་མཁན་པོའི་གསུང་དྲན་ཏེ། རྒྱ་གར་ནས་ཀ་མ་ལ་ཤཱི་ལ་གདན་དྲངས་པ་བཞིན་བྱོན་ཏེ། ཏྭོན་རྩེན་རྩོད་པས་ཧྭོན་མུན་ཕམ་སྟེ་ཧྭ་ཤང་རྒྱ་ཡུལ་དུ་བརྫངས། དེའི་ལུགས་མི་བྱེད་པར་བཀས་བཅད། ཀ་མ་ལས་སྒོམ་རིམ་གྱི་བསྟན་བཅོས་བརྩམས། སྦ་བཞེད་དུ། བཙན་པོས་རྒྱའི་ཆོས་འདི་མིན་ནམ་བྱས་པས་ཏྭོན་མུན་དང་། ལུས་ལ་མེ་གཏོང་བའི་བརྩེ་བ་དེ་ཆོས་འདི་མིན་ནམ་བྱས་པས་བརྩེ་མིན་པར་གྲགས་པར་བཤད་པ་ནི་ལྷད་ཞུགས་པའི་བླུན་ཚིག་གི་རྟོག་བཏགས་ལས་རྒྱུ་མཚན་མེད་ཅིང་། ཏྭོན་མུན་དང་རྩེན་མུན་ཞེས་པ་རྒྱ་ནག་གི་སྐད་དེ། བོད་སྐད་དུ་ཅིག་ཅར་བ་དང་རིམ་གྱིས་པར་འགྱུར་ཞེས་མཁས་པའི་དབང་པོ་བུ་སྟོན་ཞབས་གསུང་བ་ལེགས་སོ༎
དེ་ཡང་རྒྱལ་པོ་རྣམ་གནོན་ཞེས་པ་ལྕགས་ཕོ་འབྲུག་གི་ལོ་ལ་བོད་འབངས་བྱིངས་ཀྱི་སྣང་ངོར་ཚད་པའི་སྙུན་གྱིས་མྱ་ངན་ལས་འདས་ལ། ལས་ལྡན་རྣམས་ཀྱི་ཡིད་ངོར་ཆོས་དབྱིངས་བདེ་བའི་རང་བཞིན་ཟད་མི་ཤེས་པའི་ཆུ་གཏེར་ཆེན་པོར་སྣ་ཚོགས་སྤྲུལ་པའི་བཀོད་པ་ཉལ་འགྲོའི་རྒྱུན་ཀུན་གཉིས་མེད་ཀྱི་ངང་དུ་མཛད་དེ་རྗེ་བཙུན་འཇམ་དཔལ་རྡོ་རྗེའི་ཐུགས་ཀར་ཐིམ་མོ། ། བང་སོ་མུ་ར་རི་ལ་བརྩིགས་སོ༎
ཆོས་ཀྱི་རྒྱལ་པོ་འདི་ལ་བཙུན་མོ་འགའ་ཞིག་ཡོད་ཀྱང་ཚེ་སྤོང་བཟའ་ལ་སྲས་གསུམ་བྱུང་བའི་ཆེ་བ་མུ་ནེ་བཙན་པོ་རྒྱལ་སར་བསྐོས། འབངས་ཀྱི་ལྟོགས་