[A:༧༡]རེནྡྲ་བོ་དྷི། དྷ་ན་ཤཱི་ལ་སོགས་པཎྜི་ཏ་དུ་མ་དང་། ལོ་ཙཱ་བ་སྐ་ཅོག་སོགས་གདན་འཛོམ་པར་བྱས་ཏེ། སྔར་ཡབ་མེས་ཀྱི་རིང་ལ་མདོ་སྔགས་ཀྱི་ཆོས་ཕལ་ཆེ་བ་བསྒྱུར་ཟིན་ནའང་། ཡུལ་དབུས་འགྱུར། ཨོ་རྒྱན། བལ་ཡུལ། རྒྱ་ནག་སོགས་སྐད་དུ་མ་ལ་བརྟེན་ནས་བསྒྱུར་བའི་བོད་སྐད་ལ་བསྒྱུར་དུ་མ་བཏུབ་པ་འགའ་ཞིག་སོ་སོའི་རང་སྐད་དུ་བཞག་པས་གོ་དཀའ་ཞིང་། བརྡ་རྙིང་དང་སྡེབ་འགའ་ཞིག་ལ་བརྟེན་ནས་འགྱུར་མི་བདེ་བ་དང་ཀླག་དཀའ་ཞིང་ལེགས་སྦྱར་གྱི་སྐད་དང་མི་མཐུན་པ་རྣམས་དབུས་འགྱུར་གྱི་རྒྱ་དཔེ་སཾ་སྐྲྀཏའི་ལུགས་གཞིར་བྱས་པ་རྣམས་དང་སྒོ་བསྟུན། རྒྱ་དཔེའི་བཅད་ལྷུག་སྤེལ་མའི་སྡེབ་སྦྱོར་སོགས་བོད་སྐད་ལ་ཇི་བཞིན་མི་འབྱུང་ཞིང་། དེ་དང་བསྟུན་ན་གོ་མི་བདེ་བས་དོན་རྟོགས་སླ་བ་གཙོ་བར་བྱས། རྒྱ་སྐད་དུ་ཚིག་བསྡོམས་པ་རྣམས་དེ་ལྟར་བསྒྱུར་ན་གངས་ཅན་ལྗོངས་ཀྱི་སྐད་དུ་འཕྱུགས་འགྲོ་བ་དག་ཕྲལ་ཏེ་བསྒྱུར་བ། ཀུ་ཤ་ལ་ཨི་གཎ་གྱི་རྐྱེན་བྱིན་པའི་ཀཽ་ཤི་ཀ་ལྟ་བུ་སྒྲ་གཅིག་དོན་མང་གཅིག་ཏུ་འཆད་པར་གཏན་ཚིགས་ཀྱིས་བསྒྲུབས་དཀའ་བ་ཀུན་རང་སོར་བཞག་མདོར་ན་བྱིངས་ལས་མིང་དང་ཚིག་གིས་བསྒྲུབས་ཤིང་། རྣམ་དབྱེ་དེ་ཕན་ཉེ་སྒྱུར་ཚིག་ཕྲད་སོགས་མཐའ་དག་ལ་ཞིབ་མོར་དཔྱད། དེ་ཉིད་བོད་ཀྱི་སྐད་ལ་དོན་འགྱུར་གཙོ་བོར་བྱས་དེ་གཏན་ལ་ཕབ་བོ༎
ཆོས་ཀྱི་རྒྱལ་པོ་མེས་དབོན་གྱི་རིང་ལ་མཆོག་དམན་མཐའ་དག་གི་སེམས་ཀྱི་རི་དྭགས་རང་ཉམས་སུ་འཁྱམ་པར་མི་ནུས་པའི་ཞགས་པ་དམ་པོས་ཡངས་པའི་རྒྱལ་ཁམས་མཐའ་དག་རང་སར་བདེ་བའི་ཁྲིམས་ཀྱི་བྱ་བ་མཐའ་ཀླས་པར་མཛད་པས། ཡིད་འཕྲོག་མའི་གཏམ་རྒྱུད་ལས། བྱང་ཕྱོགས་ལྔ་ལྡན་སྐྱིད་ཅིང་རྒྱལ་བ་དེ། རྒྱལ་པོ་དེ་ཡི་རྒྱལ་ཁྲིམས་ཆོས་བཞིན་སྤྱད་པ་དང་། འབངས་འཁོར་གཡོག་རྣམས་ཀྱིས་རྒྱལ་པོའི་བཀའ་ལ་ཉན་པས་སྐྱིད་པ་ཡིན་ཞེས་པའི་དོན་དང་མཐུན་པར་གྱུར་ཅིང་། དེ་ཡང་ཁྲིམས་ནི། བོད་རྒན་པོ་ཡ་རབས་རྣམས་