[A:༧༢]ཀྱིས་གླེང་བའི་སྲིད་པའི་ཁོག་རུབ་ཆེན་པོ་ལ་དོན་སུམ་ཅུ་རྩ་གཉིས་སུ་གྲགས་པའི་བཅུ་དགུ་པ་ཁྲིམས་ཆེན་པོ་ལ། ཁྲི་རྩེ་འབུམ་གཞེར་གྱི་ཁྲིམས། གསེར་ཐང་ཤ་བ་ཅན་གྱི་ཁྲིམས། རྒྱལ་ཁམས་དཔེ་བླངས་ཀྱི་ཁྲིམས། མདོ་ལོན་ཞུས་བཅད་ཀྱི་ཁྲིམས། དཀོན་ཅོག་གི་ཆོས་ཁྲིམས། ཇོ་མོ་མངའ་དྭགས་ཀྱི་ཁྲིམས་དང་དྲུག་ཏུ་ཕྱེ་བས། ངན་ལ་ཆད་པ་གཅོད་ཅིང་བཟང་ལ་བྱ་དགའ་སྟེར། མཐོ་བའི་གཉའ་ནས་གནོན་ཅིང་དམའ་བ་ཐབས་ཀྱིས་སྐྱོང་བའི་བཀའ་ཁྲིམས་ཀྱི་སྲོལ་བཟང་པོའི་འོད་སྣང་སྲིད་རྩེའི་བར་དུ་ཁྱབ་པའི་བདེ་སྐྱིད་ཀྱི་པུཎྜ་རཱི་ཀ་ཆེས་ཆེར་རྒྱས་པ་བར་སྐབས་སུ། སྡིག་བློན་མི་གཙང་བའི་འདམ་གྱི་དྲི་མས་ཅུང་ཟད་སྦགས་པ་ལྷག་མ་ཙམ་ཡང་། དག་པར་མཛད་དེ་ཡངས་པའི་ནོར་འཛིན་གྱི་ཁྱོན་ཀུན་ཏུ་དྲིལ་བསྒྲགས། གཞན་ཡང་སྨན་གྱི་བཅོས་ལུགས་བཞི། དཔྱད་མཁན་གྱི་གབ་རྩེ་ལྔ། ཡ་རབས་ཀྱི་སྐྱེན་བདུན། མཛངས་པའི་མིག་བཅུ་གཉིས། ཕོ་ལྟང་གི་ཉེར་བརྒྱད། མོ་ལྟང་གི་ཉེར་བཅུ་གཉིས། ཕྱག་རྒྱ་དྲུག་རྒྱལ་པོའི་གདན་བཞི། བློན་པོའི་གྲལ་བརྒྱད། ཕྱག་རྐ་རྩ་བུ་བརྒྱད། མཛའ་སྡུམ་བཞི་སོགས་བོད་འབངས་ཀྱི་གཏམ་དང་ཡིག་ཚང་དུ་གྲགས་ཤིང་། ལག་ཏུ་སྟེར་འོས་པ་རྣམས་ལེན་པའི་སྲོལ་ཆོས་ཀྱི་རྒྱལ་པོ་འདི་ཡན་དུ་མ་ཉམས་པར་གནས་པ་ཡིན་ནོ། ། དཔའ་བོ་གཙུག་ལག་གིས། གསང་སྔགས་རྫོགས་འཚང་རྒྱ་བའི་རྒྱུ། ། ནོར་དུ་མི་བཙོང་སྙིང་ལ་བཅང་། ། ཞེས་པའི་ཁྲིམས། ཆོས་རྒྱལ་སྲོང་བཙན་སྒམ་པོའི་སྐབས་བྱུང་བར་སྨྲ་བ་ནི་བླུན་ཚིག་སྟེ། ཆོས་རྒྱལ་གྱི་དུས་སྣོད་ལྡན་འགའ་ཞིག་ལ་བཙན་པོ་རང་གིས་ཐུགས་རྗེ་ཆེན་པོ་ཞི་ཁྲོ་སོགས་གནང་བ་ལས། གསང་སྔགས་ཀྱི་ཆོས་ནོར་གྱི་ཕྱིར་འཚོང་བ་ལྟ་བུའི་ཁྱབ་གདལ་དུ་གྲགས་པ་མེད་པས། ཁྱད་གཞི་མེད་པའི་ཁྱད་ཆོས་དང་། དགེ་བཅུའི་ཁྲིམས་ཀྱི་སྟེང་དུ་མི་ཆོས་གཙང་མ་བཅུ་དྲུག་གི་ཁྲིམས་མཛད་པར། དེ་གཉིས་དྲིལ་བས་བཅུ་དྲུག་ཡིན་པ་ལྟར་སྨྲ་བ་སོགས་ཀྱི་འཆལ་ཤིན་ཏུ་མང་ངོ༎