[A:༧༣]འདིའི་དུས་སུ་རྒྱ་བོད་གཉིས་མ་མཐུན་པར། གཏུམ་དྲག་རྔམ་བརྗིད་དང་ལྡན་པའི་དམག་གི་དཔུང་ཚོགས་ཆེན་པོ་རྒྱ་ནག་པོའི་ཡུལ་དུ་གཡུལ་བཤམས་ཏེ། ཙི་ནའི་རྒྱལ་ཁམས་དུ་མ་བཅོམ་ཞིང་། མི་དཔོན་དང་། དཔའ་བོ་སྟག་ཤར་མང་དུ་བསད་དེ་ཆམ་ལ་ཕབ། དེ་ནས་རྒྱའི་ཧྭ་ཤང་དང་བོད་ཀྱི་ལོ་པཎ་རྣམས་ཀྱིས་བར་དུ་བཞུགས་ཏེ་ཚིག་གི་སྦྱངས་བཤད་ཀྱིས་དབོན་ཞང་མཐུན་པར་མཛད། རྒྱའི་གུང་གུ་རྨེ་རུར་རྡོ་རིང་ཞིག་བཙུགས་ཏེ་རྒྱ་བོད་ཀྱི་ས་མཚམས་སུ་བཅད་ནས་ཕན་ཚུན་གཉིས་ཀས་ས་མཚམས་ལས་ཕྱི་རོལ་ཏུ་བསྒྲལ་བའི་དམག་གི་གཡུལ་བཤམས་པ་སོགས་མི་བྱེད་པའི་དཔང་དུ་ལྷ་ཀླུ་གཉན་པོ་བཞག་སྟེ་བྲོ་བོར་བའི་ཡི་གེ་ལྷ་ས། རྒྱ་རྗེའི་ཕོ་བྲང་། རྨེ་རུ་གསུམ་གྱི་རྡོ་རིང་ལ་བྲིས། དུས་དེར་རྒྱ་བོད་གཉིས་མཐུན་ཞིང་འབྲེལ་བཟང་བར་བྱུང་བས། གནམ་ལ་ཉི་ཟླ་ཟུང་གཅིག་དང་། ས་ལ་བཙན་པོ་དབོན་ཞང་ཞེས་གླེང་སྐད་དོ༎
དེ་ཡང་བཙན་པོའི་ཐུགས་སུ་འགྲོ་བ་ཀུན་ལ་ཕན་པ་དང་བདེ་བ་མ་ལུས་པར་འབྱུང་བའི་སྒོ་དམ་པ་ནི་ལུང་དང་རྟོགས་པའི་བསྟན་པ་རིན་པོ་ཆེ་ལ་རག་ལས་ཤིང་། དེ་འཛིན་ཞིང་སྤེལ་བར་བྱེད་པ་དགེ་འདུན་ལ་ལྟོས་པར་དགོངས་ཏེ། དབུ་སྐྲ་ལ་དར་ཡུག་བཏགས་པའི་སྟེང་ལ་རབ་ཏུ་བྱུང་བ་རྣམས་བཞུགས་སུ་འཇུག་པ་དང་། དགེ་འདུན་མི་རེ་ལ་འབངས་མི་ཁྱིམ་བདུན་དུ་བཅད་དེ་འབུལ་བ་སོགས་འཕགས་པའི་ཡུལ་དུ་བྱུང་བའི་ཆོས་ཀྱི་རྒྱལ་པོ་རྣམས་ཀྱི་མཛད་པ་ལས་བླ་ལྷག་ཏུ་གྱུར་པའི་མཛད་པ་བཟང་པོའི་གཏམ་ཀུན་གསལ་གྱི་མཐའ་ཀླས་པར་ཁྱབ་བོ༎
དེ་ནས་མེས་རྣམས་ཀྱི་གཙུག་ལག་ཁང་ལ་རྙེད་བཀུར་ཞིག་གསོས་མཛད་ཅིང་། གསར་དུ་གཙུག་ལག་ཁང་འོག་ཐོག་གསུམ་རྡོ། བར་ཐོག་གསུམ་ས་ཕག་སྟེང་ཐོག་གསུམ་ཤིང་ལས་གྲུབ་པ། ཐོག་རེ་རེ་བཞིན་བྱ་འདབ། སྒོ་ཕ་གུ་དྲ་ཕྱེད་སོགས་ཀྱིས་རྣམས་པར་མཛེས་ཤིང་། སྟེང་གི་རྒྱ་ཕུབ་རླུང་གིས་བསྐྱོད་ཚེ་