[A:༨༦]དབང་པོ་ལྟར་འཆད་རྩོད་རྩོམ་པ་དང་ཐོས་བསམ་སྒོམ་པའི་ཆ་ཤས་ཀྱི་ཉ་ཡོངས་སུ་གང་བ་ཡིན་ཅིང་། མཁས་གྲུབ་དེ་དག་དགུང་ལོ་བགྲེས་གཞོན་མ་གཏོགས་ཕལ་ཆེར་དུས་མཚུངས་པར། མཁས་པའི་དབང་པོ་ཡེ་བཟང་རྩེ་བ་ཞི་བ་ཆོས་ཀྱི་དབྱིངས་སུ་སྐུའི་བཀོད་པ་བསྡུས་པའི་རྗེས་སུ། རང་དང་གཞན་གྱི་གྲུབ་པའི་མཐའ་རྒྱ་མཚོ་ཆེན་པོའི་ཕ་རོལ་ཏུ་སོན་ཞིང་། ཐུབ་བསྟན་ཡོངས་ཀྱི་རྩ་ལག་གཅིག་པུ་གྲངས་མེད་རྒྱལ་བའི་འཁོར་ལོའི་དབང་ཕྱུག་འཁོན་སྟོན་ཆོས་ཀྱི་རྒྱལ་པོས་ཡུལ་དེ་ཝི་ཀོ་ཊ་མིང་གཞན་ཕ་བོང་ཁའི་དཀར་ཆག་ཏུ་བཀའ་སྩལ་ཏོ། །
རྩེ་ལྡེའི་སྲས་འབར་ལྡེ། དེའི་སྲས་བཀྲ་ཤིས་ལྡེ། དེའི་སྲས་བྷ་ནེ། དེའི་སྲས་ནཱ་ག་དེ་ཝ།
༈ དེའི་སྲས་བཙན་ཕྱུག་ལྡེ། འདིས་ཡ་ཚེར་བྱོན། དེའི་སྲས་བཀྲ་ཤིས་ལྡེ། དེའི་སྲས་གྲགས་བཙན་ལྡེ། དེའི་སྲས་གྲགས་པ་ལྡེས་གསེར་ཕྱེ་བྲེ་བདུན་ལས་གྲུབ་པའི་འཇམ་དབྱངས་དང་། དངུལ་དཀར་སྟོང་ཕྲག་བཅུ་གཉིས་ལས་གྲུབ་པའི་བྱམས་པ་སོགས་སྐུ་གསུང་ཐུགས་རྟེན་མང་དུ་བཞེངས། དེའི་སྲས་ཨ་སོ་ལྡེས་རྡོ་རྗེ་གདན་དུ་མཆོད་པའི་རྒྱུན་བཙུགས། དེའི་སྲས་འཛི་དར་རྨལ་དང་ཨ་ནན་རྨལ་གཉིས། ཕྱི་མས་གསེར་གྱི་བཀའ་འགྱུར་བཞེངས། དེའི་སྲས་རིའུ་རྨལ་གྱིས་དངུལ་དཀར་བཞི་བཅུ་ལ་སྨན་བླ་མཆེད་བརྒྱད་དང་། འཕྲུལ་སྣང་དུ་གསེར་ཐོག་ཕུབ། དེའི་སྲས་སདྒྷ་རྨལ། དེའི་སྲས་འཛི་དར་རྨལ་གྱི་སྲས་ཨ་འཛིད་རྨལ་གྱིས་རྒྱལ་ས་མ་ཐོབ་གོང་དུ་ས་སྐྱར་རབ་བྱུང་མཛད། སླར་སྲིད་བཟུང་། དེའི་སྲས་ཀ་ལན་རྨལ། དེའི་སྲས་བར་བཏབ་རྨལ། འདི་ནས་ཡ་ཚེའི་གདུང་བརྒྱུད་ཆད་དེ་པུ་རང་ན་མངའ་བདག་བསོད་ནམས་ལྡེ་སྤྱན་དྲངས་ནས་སྲིད་བཟུང་བས་པུ་ཎྱ་རྨལ་དུ་གྲགས་སོ། །
༈ ཁྲི་བཀྲ་ཤིས་བརྩེགས་པ་དཔལ་ལ་སྲས་དཔལ་ལྡེ། འོད་ལྡེ། སྐྱིད་ལྡེ་གསུམ་བྱུང་བའི་ཆེ་བ་བརྒྱུད་པ་གུང་ཐང་པ། ཀླུ་རྒྱལ་བ། སྤྱི་པ་ལྷ་རྩེ་