[A:༩༣]ཞིག་བཏབ་པས་ས་སྐྱ་གོག་པོར་གྲགས་ཤིང་། དེའི་ཚེ་རིའི་རྩེ་ནས་གཟིགས་པས། དཔོན་པོ་རིའི་ངོས་འགྲམ་ན་ས་དཀར་ཞིང་སྣུམ་པ་བཀྲ་ཤིས་པའི་དགེ་མཚན་དུ་མ་དང་ལྡན་པའི་ཡུལ་དུ་མཁྱེན་ཏེ། བདག་པོ་རྣམས་ལ་ནོར་བུའི་འཕྲེང་བ་སོགས་ཀྱི་རིན་གྱིས་ཉོས་ཏེ། དཔལ་ལྡན་ས་སྐྱའི་དགོན་པ་བཏབ།
འཁོན་དཀོན་ཅོག་རྒྱལ་པོར་ཇོ་མོ་མ་གཅིག་ཞང་མོ་ལ་བླ་མ་ས་སྐྱ་པ་ཆེན་པོ་ཀུན་དགའ་སྙིང་པོ་འཁྲུངས་ཏེ་མདོ་སྔགས་ཀྱི་ཆོས་དུ་མ་ལ་ཐོས་བསམ་སྒོམ་པ་ཕུལ་དུ་ཕྱིན་པ་མཛད། འཇམ་དབྱངས་ཨ་ར་པ་ཙ་ནའི་གསང་བ་གསུམ་གྱི་བདུད་རྩིའི་ཆུ་རྒྱུན་གྱིས་ཐུགས་ཀྱི་བུམ་བཟང་ཡོངས་སུ་གང་བས། རྗེ་བཙུན་འཇལ་དཔལ་དབྱངས་ཀྱི་རྣམ་འཕྲུལ་དུ་ཤེས་ལྡན་མཐའ་དག་གོར་མ་ཆག་པས་དཔལ་ས་སྐྱ་པ་འཇམ་དབྱངས་འཁོན་གྱི་རིགས་ཞེས་གྲགས་ཤིང་། ཁྱད་པར་གསང་ཆེན་རྡོ་རྗེ་ཐེག་པའི་བསྟན་པའི་བདག་པོར་གྱུར་པས། རྒྱ་གར་དུ་ཡང་བིརྺ་པའི་སྤྲུལ་པ་ས་སྐྱ་པ་བྱ་བའི་གྲགས་སྙན་གྱི་ཟེའུ་འབྲུ་ཕྱོགས་བྲལ་ཐོས་འཛིན་འདམ་སྐྱེས་ཀྱི་ངོས་སུ་གཡུར་ཟ་ལྡེམ་ཞིང་། མདོར་ན་དུས་གཅིག་ཏུ་སྐུའི་བཀོད་པ་མི་འདྲ་བ་མཐའ་ཡས་པ་སྟོན་པ་སོགས་རྗེ་བཙུན་ས་ར་ཧས་མཚོན་པའི་འཕགས་ཡུལ་གྱི་གྲུབ་པའི་དབང་ཕྱུག་མཐའ་དག་གི་ཁེངས་པའི་རྒྱུད་འགུགས་པར་བྱེད་པའི་ཁ་སྦྱོར་བདུན་ལྡན་གྱི་བླ་ན་མེད་པའི་ལམ་གྱི་པདྨ་དཀར་པོའི་ཆུན་པོ་འདོད་པའི་བདེ་བ་གཉིས་མེད་མཐའ་ཀླས་པའི་ཅོད་པན་རྣམ་པར་བཅིངས་པས་འབྲས་བུའི་ཐེག་པ་ལ་གཅིག་ཏུ་བཀའ་དྲིན་ཆེ།
དམ་པ་འདི་ལ་སྲས་བཞི་བྱུང་བའི་ཆེ་བ་འཁོན་ཀུན་དགའ་འབར་རྒྱ་གར་དུ་བྱོན་པ་ཚད་པས་གཤེགས། དེ་འོག་མི་ཐུབ་ཟླ་བའི་སྤྲུལ་པ་འཁོན་བསོད་ནམས་རྩེ་མོ་ནི་ཡབ་མེས་ཀྱི་ཆོས་འབྲས་བུའི་ཐེག་པ་དང་། གསང་ཕུར་ཆ་པ་ལ་རྒྱུའི་ཐེག་པར་ཐོས་བསམ་མཛད།
དེའི་གཅུང་འཁོན་གྲགས་པ་རྒྱལ་མཚན་ནི་རྡོ་རྗེ་འཛིན་པའི་ཆོས་ཀྱི་རྒྱལ་