[A:༩༤]སྲིད་ལ་མངའ་སྒྱུར་བས་གྲུབ་པའི་དབང་ཕྱུག་ཆེན་པོ་དེ་ཐོས་བསམ་སྒོམ་པའི་གྲུ་གཟིངས་ལ་བརྟེན་ནས་ཟུང་འཇུག་ནོར་བུའི་གླིང་དུ་གཤེགས་པ། ཡོན་ཏན་གྱི་དངོས་པོ་བརྗོད་པའི་མཐའ་དང་བྲལ་ཞིང་། ཁ་ཆེ་པཎ་ཆེན་གྱི་ཉི་ཟླ་གཟའ་འཛིན་འབྱུང་བར་ལུང་བསྟན་པ། རྗེ་གྲགས་པས་རྩ་རླུང་ལ་གཟིར་བས་མ་བྱུང་བ་དང་། རྡོ་རྗེ་དང་དྲིལ་བུ་ནམ་མཁར་འཇོག་ནུས་ཤིང་རང་སྒྲ་འཁྲོལ་བ། མ་མགོན་ལྕམ་དྲལ་བྲན་དུ་འཁོལ་ནུས་པ་སོགས་ངོ་མཚར་བའི་མཛད་པ་ཤིན་ཏུ་མང་།
དེའི་གཅུང་འཁོན་དཔལ་ཆེན་འོད་པོ་ཆེའི་སྲས་གཉིས་ལས། ཆེ་བ་འཁོན་དཔལ་ལྡན་དོན་གྲུབ་ནི་སྐྱེ་བ་ཉི་ཤུ་རྩ་ལྔ་ལ་མིའི་སྲིད་པ་བཟུང་ཞིང་། འཇམ་དཔལ་དབྱངས་ཀྱི་བྱིན་རླབས་ག་པུར་གསར་པའི་ཐིགས་པ་སྙིང་ལ་སིམ་པས་མི་ཤེས་པའི་ཚ་གདུང་རྒྱང་རིང་པོར་བསྲིངས་པས་ཆུང་ངུའི་དུས་ནས་སཾ་སྐྲྀཏའི་སྐད་སྨྲ་བ། ལཉྪ་དང་ཝརྟུའི་ཡི་གེ་འདྲི་བ་སོགས་སྔོན་གྱི་བག་ཆགས་སད་པའི་རྣམ་འགྱུར་དུ་མ་མཛད་ཅིང་། རྗེ་གྲགས་པའི་དྲུང་དུ་དགེ་བསྙེན་གྱི་སྡོམ་པ་བླངས་པའི་མཚན་ཀུན་དགའ་རྒྱལ་མཚན་དུ་བཏགས། གཞོན་ནུའི་དུས་ནས་སྒོམ་ཆེན་རྒན་པོའི་རྣམ་ཐར་འཛིན་པའི་རྫུ་བག་གི་མི་ཚེ་དོན་མེད་དུ་སྟོང་པར་ཡོལ་བའི་ལུགས་རྣམས་ཆུ་ཤིང་གི་སྙིང་པོ་ལྟ་བུར་གཟིགས་ནས་མཁས་པ་དང་གྲུབ་པའི་བླ་མ་དུ་མ་བསྟེན་ཏེ། བཟོ་རིག་པ། གསོ་བ་རིག་པ། སྒྲ་རིག་པ། གཏན་ཚིགས་རིག་པ། ནང་རིག་པ་སྟེ་ཆེ་བ་ལྔ་དང་། སྙན་དངགས། མངོན་བརྗོད། སྡེབ་སྦྱོར། ཟློས་གར། སྐར་རྩིས་སོགས་མདོར་ན་རིག་པའི་གནས་མཐའ་དག་ལ་མཁས་པར་སྦྱངས་ཤིང་། ས་སྐྱ་པཎྜི་ཏ་ཞེས་སྙན་པའི་གྲགས་པ་དབུས་འགྱུར་རྡོ་རྗེ་གདན་གྱི་མཛེས་རྒྱན་དུ་སྤུད། བོད་འདིར་གནས་ལྔ་རིག་པའི་སྲོལ་འབྱུང་བ་འདི་ཉིད་ཀྱི་བཀའ་དྲིན་ཡིན་ཅིང་། མིང་དང་དོན་མཐུན་པའི་མཁས་པ་ཟུར་མཁར་བློ་གྲོས་རྒྱལ་པོས། སེམས་ཀྱི་ཆོས་ཉིད་རྗེན་འཆར་