[A:༩༧]འཕགས་པས་སོ་སོའི་ལུགས་བཞིན་བྱེད་དུ་འཇུག་པར་ཞུས་པས། རྒྱལ་པོས་བླ་མ་དེ་ལྟར་གསུང་ན་རང་རང་གི་ལུགས་བཞིན་གྱིས་ལ། ངེད་ལ་སྨོན་ལམ་ཐོབ་གསུང་བའི་འཇའ་ས་གནང་། དབུས་གཙང་གི་ཕྱོགས་སུ་ཆས་རྐྱེན་དུ་མ་བརྫངས་པ་ལ་བརྟེན་ནས། དཔོན་ཆེན་ཤཱཀྱ་བཟང་པོས་གསེར་འོད། ནང་རྟེན་ཐུབ་ཆེན། ཕྱི་རྟེན་གསེར་འབུམ་བཞེངས། མི་རིང་བར་བླ་མ་ཡང་ས་སྐྱར་ཕེབས། གསེར་འབུམ་བཀྲ་ཤིས་སྒོ་མང་དང་། ཕྱིའི་སྐྱ་འབུམ་བདུན་ལ་གསེར་ཟངས་ལས་གྲུབ་པའི་གདུགས་ཆོས་འཁོར་དང་། ས་པཎ་གྱི་གསེར་འབུམ་ལ་གསེར་ཐོག་བཟོས། རྒྱལ་བའི་བཀའ་པོ་ཏི་ཉིས་བརྒྱ་ལྷག་ཙམ་གསེར་གྱིས་བཞེངས། སླར་གོང་མས་གདན་འདྲེན་གྱི་གསེར་ཡིག་ནན་ཆེན་མངགས་པ་ལ་བརྟེན། བཤུལ་དུ་ཞུགས་པའི་ཞར་བྱུང་དུ་གྱེ་རེ་ལྷ་ཁང་དུ་ཕེབས་ནས་གཟིགས་རྟོག་མཛད་དེ། མི་ལ་ཉེ་གནས་གོ་ཆོད་འདི་འདྲ་བྱུང་འདུག་གསུངས་པས་རྐྱེན་བྱས་ཏེ། དཔོན་ཆེན་ཤཱཀྱ་བཟང་པོས་གྱེ་རེ་ལྷ་ཁང་ལ་ཐིག་ཚད་བླངས་ཏེ་ཁྲི་བསྐོར་བཅུ་གསུམ་བསྐུལ་ནས་ལྷ་ཁང་ཆེན་མོ་བརྩིགས། འགྲོ་མགོན་ཕོ་བྲང་ཆེན་པོར་ཕེབས་པ་ན། རྒྱལ་པོས་གནམ་གྱི་འོག་སའི་སྟེང་། རྒྱ་གར་གྱི་ལྷའི་སྲས་པོ། ཡི་གེ་རྩོམ་མི། སྤྲུལ་པའི་སངས་རྒྱས། རྒྱལ་ཁམས་འཇགས་སུ་འཇུག་མི། སྙན་ངག་གི་རྒྱུ། པཎྜི་ཏ་འཕགས་པ་ཏི་ཤྲཱི་ཞེས་པའི་མཚན་དུ་མངའ་གསོལ། འབུལ་བ་ལན་རེ་ལ་ཚན་ཆེ་བ། དངུལ་བྲེ་ཆེན་སྟོང་ར་ཅན་ཚན་པ་གཉིས། གོས་དར་ལྔ་སྟོང་དགུ་བརྒྱ་བཞི་བཅུ་ཕུལ། སྐབས་ཤིག་ཀརྨ་པཀྴིས་ཆུ་ལ་འཛུལ་བ། མཁའ་ལ་འཕུར་བ། ཕ་བོང་བརྫི་བ་སོགས་རྫུ་འཕྲུལ་དུ་མ་བསྟན་པ་ན། རྒྱལ་པོས། རང་རེའི་ཏི་ཤྲི་འཕགས་པ་འདི་སངས་རྒྱས་སྣང་བ་མཐའ་ཡས་མིའི་གཟུགས་སུ་སྤྲུལ་པ་ཞིག་ཡིན་ཀྱང་། རྫུ་འཕྲུལ་དང་རྟོགས་པ་རྟོགས་ལྡན་རྒྱ་བོ་འདི་མཐོ་བར་འདུག་གསུངས་པས། བཙུན་མོ་ཆའུས་བླ་མའི་དྲུང་དུ་རྒྱུ་མཚན་རྣམས་བསྐྱར་ཏེ། པཀྴི་ལ་མཆོད་