[A:༩༦]བཀོད་པ་ཡང་སྤྲུལ་པའི་སྡེ་ཉིད་དུ་བསྡུས་སོ། །
ཆོས་རྗེའི་གཅུང་ཟངས་ཚ་བསོད་ནམས་རྒྱལ་མཚན་ལ་སྲས་ལྕམ་སྲིང་བརྒྱད་བྱུང་བའི་མ་གཅིག་ཀུན་དགའ་སྐྱིད་ཀྱི་སྲས་བླ་མ་འཕགས་པ་དང་། ཕྱག་ན་གཉིས་ལས་ལོ་ཙཱ་བ་སྐ་བ་དཔལ་བརྩེགས་ཀྱི་སྐྱེ་མཐའ་འཕགས་པ་རིན་པོ་ཆེ་ནི་ཆུང་ངུའི་དུས་ནས་གསུང་རབ་ལ་ཐོས་བསམ་ལེགས་པར་མཛད་ཅིང་། ཧོར་ཡུལ་དུ་འབྱོན་པའི་དུས། དབུས་ཀྱི་སའི་ཆར་རབ་ཏུ་བྱུང་བའི་མཚན་བློ་གྲོས་རྒྱལ་མཚན་དཔལ་བཟང་པོར་གསོལ་ཞིང་། ཆོས་རྗེ་ས་པཎ་དང་རྒྱལ་པོ་གོང་མ་མཆོད་ཡོན་ཞི་བར་གཤེགས་རྗེས། སེ་ཆེན་རྒྱལ་པོ་གོང་མའི་ཁྲི་ཐོག་ཏུ་བྱོན་པ་དང་། འཕགས་པ་རིན་པོ་ཆེ་དགུང་ལོ་བཅུ་དགུ་ལོན་པ་རྒྱལ་པོའི་ཏི་ཤྲིར་གྱུར་ནས། ཀྭ་དིན་གུ་ཤྲིའི་མཛད་མདོ་གཡང་ཊིའི་དམ་ཁ། གསེར་དང་མུ་ཏིག་གིས་བརྒྱན་པའི་སྣམ་སྦྱར། རིན་པོ་ཆེས་སྤྲས་པའི་ཕྱམ་རྩེ། རིན་པོ་ཆེའི་ལས་ཞྭ། གསེར་གྱི་གདུགས་དང་ཁྲིའུ་སོགས་བཀོད་པས་ཁྱད་པར་དུ་འཕགས་པའི་དངོས་པོ་དུ་མ་དང་། གཞན་ཡང་གསེར་བྲེ་དངུལ་བྲེ། རྟ། རྔ་མོང་། ཇ་གོས་དར་སོགས་བདོག་པའི་ཡོ་བྱད་ཀྱི་འདོད་རྒུ་མཐའ་ཡས་པ་ཕུལ། དེ་ནས་མདོ་ཁམས་སུ་ཕེབས་ནས་མཁན་པོ་གྲགས་པ་སེང་གེའི་དྲུང་དུ་སྤོང་བདུན་འཁོར་བཅས་ཀྱི་ཚུལ་ཁྲིམས་ཡང་དག་པར་མནོས་ཏེ། སླར་གོང་མའི་ཕོ་བྲང་དུ་ཕེབས། ཧོར་ཡིག་གསར་བསླབས་པའི་ཡིག་ཕུད་ལ། བནྡྷེ་ཤེད་སྐྱེས་ཀྱི་འཇའ་ས་ཐོག་མ་གནང་། རྒྱལ་པོས་རྡོ་རྗེ་ཐེག་པའི་ཆོས་ཀྱི་བདུད་རྩིའི་དགའ་སྟོན་ལན་གསུམ་དུ་སྤྱད་པའི་དང་པོའི་དུས་སུ་བོད་ཁྲི་བསྐོར་བཅུ་གསུམ་ཕུལ། གཉིས་པའི་དུས་སུ་བོད་ཆོལ་ཁ་གསུམ་ཕུལ། གསུམ་པའི་དུས་སུ་རྒྱའི་མི་ཡུར་ཆེན་མོ་དང་། རྒྱལ་པོ་མ་སྐྱེས་དགྲའི་གདུང་སྐལ་གྱི་བདེ་བར་གཤེགས་པའི་འཕེལ་གདུང་རྣམས་ཕུལ། རྒྱལ་པོས་བོད་ཀྱི་བནྡྷེ་རྣམས་ས་སྐྱ་པའི་ཆོས་ལུགས་མ་གཏོགས་གཞན་བྱེད་དུ་མི་འཇུག་པའི་གསུང་སྔ་ཕྱིར་བྱོན་པ་ན། འགྲོ་མགོན་