[A:༩༨]གནས་ཀྱི་གཙོ་བོ་བཅོལ་ན་ས་སྐྱའི་གདུང་བརྒྱུད་རྣམས་ལ་གནོད་པས་རྫུ་འཕྲུལ་སྟོན་པར་ཞུས་པས། རྒྱལ་བློན་གྱི་དབུས་སུ་བླ་མས་རལ་གྲིས་དབུ་དང་ཕྱག་ཞབས་རྣམས་སོ་སོར་ཕྲལ་ཏེ། རྒྱལ་བ་རིགས་ལྔར་བྱིན་གྱིས་བརླབས་ཏེ་བསྟན་པ་སོགས་སྤྲུལ་པ་ངོ་མཚར་བ་དུ་མ་འདྲེན་བྱེད་ཀྱི་དགའ་སྟོན་དུ་སྩལ། དེ་ནས་སླར་གདན་ས་དཔལ་ལྡན་ས་སྐྱར་ཕེབས་ཏེ། དགེ་འདུན་འབུམ་དུ་ཉེ་བ་ལ་བསྙེན་བཀུར་ཕུན་སུམ་ཚོགས་པའི་དུས་སྟོན་ཁྱད་པར་ཅན་ཆུ་མིག་ཆོས་འཁོར་དུ་གྲགས་པ་མཛད། དུས་དེར་ཀུན་དགའ་བཟང་པོ་དཔོན་ཆེན་དུ་ཡོད་པ་བླ་མའི་ཐུགས་དང་འགལ་བ་འགའ་བྱས་ཞེས་ཉེ་གནས་ཀྱིས་གོང་མ་སེ་ཆེན་ལ་ཕྲ་མ་ཞུས་པས། ཧོར་དམག་གིས་བྱ་རོག་རྫོང་ཕབ། དཔོན་ཆེན་བསད་། བྱ་རོག་རྫོང་དུ་དམག་གི་ཁྲིམས་རྔ་བརྡུང་། ། སྙིང་མེད་པོ་ཚོ་གསེར་ཕྱེ་ཆུ་ལ་འབོ། ། ཞེས་པའི་ལུང་བསྟན་དུས་ཐོག་ཏུ་བབས། དེའི་སྔོན་མའི་ལོ་ནང་དུ་བླ་མ་འཕགས་པ་ལྷ་ཁང་བླ་བྲང་དུ་ཞི་བར་གཤེགས། འགའ་ཞིག་ཉེ་གནས་ཀྱིས་ཧོར་དམག་དྲངས་པ་བླ་མས་མཁྱེན་དོགས་ནས་ལྐོག་ཏུ་བཀྲོངས་ཀྱང་ཟེར། འདི་དག་གི་དུས་དཔོན་ཆེན་འགའ་ཞིག་གི་བྱེད་པ་ལ་བརྟེན་བོད་དུ་མི་བདེ་བ་དུ་མ་བྱུང་བས། སྣ་ཐག་སས་བྱས་ཧོར་དམག་བོད་དུ་ཡོང་། ། ངན་སོང་ཟེར་ཡང་དེ་འདྲའི་སྡུག་བསྔལ་མེད། ། ཅེས་པའི་ལུང་བསྟན་གྱི་དུས་སྐབས་ཡིན་ནོ༎ ་
འགྲོ་མགོན་གྱི་གཅུང་ཕྱག་ན་ཆོས་རྗེའི་ཕྱག་ཕྱིར་གོང་མའི་གམ་དུ་བྱོན། བོད་ཀྱི་དཔོན་དུ་བསྐོས་ཤིང་ཧོར་ཆས་བྱེད་དུ་བཅུག་ཟངས་ཚའི་ཇོ་མོ་ཤབ་ཀྱི་ཇོ་འགྲོམ་ལ་སློབ་དཔོན་རིན་ཅེན་རྒྱལ་མཚན་དང་། ལྕམ་འདོ་ལེ་གཉིས་བྱུང་བའི་གཅེན་གྱིས་རྒྱུད་ལུང་མན་ངག་དུ་མ་མཁྱེན་ཅིང་། འཕགས་པ་རིན་པོ་ཆེ་བོད་དུ་བྱོན་པའི་ཤུལ་དུ་གདན་ས་མཛད། སྤྱིར་བལ་པོ་ནས་མདོ་ཁམས་ཡན་གྱི་རྒྱལ་བའི་བཀའ་འགྱུར་རོ་ཅོག་དགེ་འདུན་རྣམས་ཀྱིས་ཀློག་པའི་བསྙེན་བཀུར་དང་། རྒྱ་བལ་མཚམས་ན་བཞུགས་པའི་འཕགས་པ་འཇའ་མ་ལིའི་གོང་མ་