[A:7a]མདོར་ན་ལོ་ཆེན་གྱི་བཤད་སྲོལ་ལ་རག་མ་ལས་པའི་བྱམས་ཆོས་ལྔ་དང་། རང་རྒྱུད་ཤར་པའི་བསྟན་བཅོས་གསུམ་དང་། ཚད་མ་རྣམ་པར་ངེས་པ་རྣམས་ཀྱི་བཤད་སྲོལ་གཞན་ནས་བརྒྱུད་པ་མེད་ཅིང་། ལོ་ཆེན་མ་བྱོན་པའི་གོང་ན། འདུལ་བ་དང་།ཆོས་མངོན་པའི་བཤད་ཉན་དར་པོ་ཡོད་ཀྱང་། རིགས་པའི་ལམ་ནས་དྲངས་པའི་དགག་སྒྲུབ་ཀྱི་རྣམ་པར་བཞག་པ། ཆོས་ཀྱི་གྲགས་པ་འི་གཞུང་དང་འཐུན་པར་འཆད་ཤེས་པ་མ་བྱུང་ངོ༎
ལོ་ཆེན་གྱི་རྗེས་སུ་འཇུག་པའི་བཤད་སྲོལ་ནི་གསུམ་སྟེ། གྲོ་ལུང་པ་ཆེན་པོ་ནས་བརྒྱུད་པ་དང་། འདྲེ་ཨཱར་ནས་བརྒྱུད་པ་དང་། ཁྱུང་རིན་ཆེན་གྲགས་ནས་བརྒྱུད་པ་རྣམས་སོ༎
དིང་སང་གི་བར་དུ་ཡོད་པ་ནི། འདྲེ་ཨཱར་དང་། ཁྱུང་ནས་བརྒྱུད་པ་དེ་ཡིན་ལ། གྲོ་ལུང་པ་ནས་བརྒྱུད་པའི་སྲོལ་ལམ་མ་ཉམས་པར་ཡོད་པ་མི་འདྲ་ཞིང་། རིན་པོ་ཆེ་བློ་བཟང་པ་ཕྱོགས་དེའི་རྒྱུད་འཛིན་དུ་ཁས་ལེན་ཀྱང་། གང་ནས་བརྒྱུད་མ་ཤེས་སོ༎
དེ་ནས་ཞར་ལས་བྱུང་བའི་ད་བརྗོད་པར་བྱ་སྟེ། སློབ་དཔོན་ཕྱ་པ་འདས་ནས་ལོ་བཅུ་བཞི་སོང་བ། ཆུ་ཕོ་སྟག་གི་ལོ་ལ། ས་སྐྱ་པཎྜི་ཏ་འཁྲུངས། དེ་མྱ་ངན་ལས་འདས་ནས་ལོ་བཞི་བཅུ་པ་ལྕགས་ཕོ་སྟག་ལ། བུ་སྟོན་རིན་པོ་ཆེ་འཁྲུངས།
དེས་ལོ་དྲུག་ཅུ་རེ་གཅིག་བཞེས་པ་ལྕགས་ཕོ་སྟག་ལ། རིན་པོ་ཆེ་གཡག་པ་འཁྲུངས། དེས་ལོ་བཅྭ་བརྒྱད་བཞེས་པ་མེ་མོ་ལུག་གི་ལོ་ལ། རྗེ་ཐབས་ཅན་མཁྱེན་པ་རོང་སྟོན་ཆོས་རྗེ་འཁྲུངས། དེས་ལོ་བཅྭ་ལྔ་བཞེས་པ་ལྕགས་མོ་བྱ་ལ། རྗེ་རྡོ་རྗེ་འཆང་ཀུན་དགའ་བཟང་པོ་འཁྲུངས། དོན་དྲུག་པ་མེ་ཕོ་བྱི་བའི་ལོ་ལ་གཤེགས། དེ་ནས་དིང་སང་ས་མོ་ཕག་གི་བར་ལ་ཉི་ཤུ་རྩ་བཞི་སོང་ངོ༎
ཡང་རྔོག་ལོ་ནས་དིང་སང་གི་བར་དུ་ལོ་གྲངས་བརྩི་ཚུལ་གོ་བདེ་བ་འདི་ཡང་ཡོད་དེ། ལོ་ཆེན་ལྔ་ཅུ་ང་གཅིག་པས་མོ་གླང་