[A:73]mnyam pa'i/ /'og gi sa gzhir dkyil 'khor lnga bzhengs te/ /phyogs bzhir gdugs dang rgyal mtshan ba dan phyar/ /khang bzang mchog der tsandan shing khri la/ /rol mo'i sgra bcas 'jam dbyangs gdung sgrom bzhugs/ /mdo dbyangs la sogs sngags skor sna tshogs dang / /zhal ltas bkod pa'i drug phrag rnam pa lnga/ /ro brgya bcud ldan dge 'dun tshogs la 'gyed/ /dad ldan skyes bus sgron me dal bus phul/ /cung zad ma 'bar nan gyis gsol ba btab/ /nyer len thugs rje'i shugs kyis pur sbyangs nas/ /sreg rdzas rin chen sna tshogs 'bru sna lnga/ /rtsi mar dgang blugs gser dngul brgya rtsa rnams/ /srid gsum 'dir 'khyams khams gsum sems can gyi/ /sdig sgrib sbyang phyir drang srong me lha dang / /bla ma chen po rdo rje 'chang chen la/ /'khor gsum yang dag cho ga shes pas phul/ /de dus lha klu gnod sbyin mi 'am ci/ /bstan la rab dga' ngo mtshar dge ba'i tshogs/ /bdag med rtogs phyir nam mkha' dngas pa byung / /du ba 'ja' gur spungs pa'i sprin gseb na/ /lha bu gzhon nu gdugs dang rgyal mtshan thogs/ /bkra shis glu dbyangs rol mo sna tshogs dang / /me tog sna tshogs du ma'i char pa dag /kun gyis mthong bar nam mkha' gang bar bab/ /du ba'i rtse mor rdo rje sngon po dang / /ral gri ljang gu utpal la sogs kyi/ /gdugs ni nam mkha' g.yas su 'khor ba dang / /dri bzang zhim pos sa phyogs gar khyab kun/ /sdug bsngal rnams spangs tshim gdung bde ba myong / /rgya yi mi gnyis mi nyag dad pa can/ /chu tshod bdun ring nyi ma gsum shar tshe/ /dpa' bar 'gro ba'i ting 'dzin phyag rgya dang / /seng ge rnam bsgyings padma bkod pa sogs/ /rdo rje lta bu'i ting 'dzin skyes pa mthong / /'og min zhugs khang gnas la phul ba yi/ /zas nor cha rkyen ri yi phung po tsam/ /rgya dang bod dang hor dang yu gur gyi/ /dge 'dun rgya mtsho khri phrag 'dus pa'i dbus/ /chos rgyal dbon po'i drung gis spang dag byas/ /tho rangs dus su nye gnas brtson 'grus can/ /bi ji rin chen grags pa'i mtha' can gyis/ /lag pa dar gtums chos gos snam