[A:72]sangs rgyas kun gyis bgrod pa gcig pa'i lam/ /rgyud sde'i dgongs pa bla na med pa'i mchog /sgrub thabs zab mo bla ma'i rnal 'byor la/ /gsol 'debs nyams len rems shig bu slob kun/ /khyed rnams thams cad gang gsung sgo nas kyang / /legs par 'ong zhes bka' yi rjes gnang mdzad/ /smal po zla ba'i yar tshes bcu bzhi yi/ /tho rangs cha la skya rengs shar ba'i tshe/ /rdo rje dril bu thugs kar bsnol nas ni/ /mkha' la dpa' bo dpa' mo mkha' 'gro'i tshogs/ /gnas gtsang lha yi bu dang bu mo rnams/ /rol mo'i sgra dang sa g.yos bsu ba dang / /bcas te dgongs pa yongs su mya ngan 'das/ /rdo rje dril bu'i phyag rgya zhag gsum du/ /brtan par bzung nas gzi brjid mdangs dang ldan/ /bco brgyad snga dro dri bzangs dar zab kyis/ /rin chen sgrom bur rim gro cher byas te/ /sna tshogs rgyan spras rin chen khri steng du/ /lha rdzas mchod pa'i sprin gyis bskor nas bzhugs/ /nyer lnga'i nyin mo mchod pa phul du btab/ /rgyal rgyud nga rgyal che ldan dpung gi tshogs/ /yan lag bzhi ldan du ma phan tshun du/ /'degs pa'i gyad la ma dum rtsod par brtsams/ /g.yul du zhugs nas 'thab mo'i sta gon byas/ /blo gros mchog gis chags sdang zhi bya'i phyir/ /rgyu yi mi gnyis de bzhin ge sar gnyis/ /yo gur gnyis dang de bzhin bod kyi bzhi/ /bcu phrag gcig gis sku gdung mkha' la bteg /rgya bod hor gsum skad rigs mi gcig pa'i/ /phal pa'i srung ma gshin rje'i pho nya bzhin/ /'jigs pa'i gzugs can lag na dbyug to thogs/ /sbyor ba rtsub kyang byams pa'i sems dang ldan/ /bsam pa ngan yang gdung sgrom gus par srung / /lha mi'i tshogs rnams me tog 'thor ba dang / /dri chab gar mkhan zhal zas rol mo'i tshogs/ /khyad par bdug spos du ma'i sprin spungs kyis/ /rab tu mchod cing gdung ba'i smre sngags 'don/ /khrims lugs chos mthun mi nyag rgyal po yi/ /chab 'og byang phyogs rgyal khams sa yi phyogs/ /ling chu rtser khab grong khyer 'ga' yi yul/ /sprul pa'i lha khang brgya phrag phyed 'das pa/ /sa gzhi yid smon lag mthil ltar