[A:78]to/ /de'i gcung por gyur pa ni rdo rje rin chen zhes bya ba yon tan bsam gyis mi khyab pa'i mdzod 'dzin cing gdul bya'i re ba ma lus pa skong ba zhig go /de'i sras shes rab yon tan zhes bya/ de'i sras yon tan 'byung gnas/ de'i sras bshes gnyen dam pa tshul khrims rgyal po zhes bya/ de'i sras gzhan la phan par brtson pa can gyi mtha' can no/ /de'i sras ni sgrub brtson dam pa bal po zhes bya/ de'i sras shAkya blo gros zhes bya ste de rnams kyang pha rol tu phyin pa dang / rdo rje theg pa'i gzhung lugs la legs par sbyangs shing man ngag rin po che du mas kun nas mdzes par byas pa 'ba' zhig go zhes gsal bar thos so/ /shAkya blo gros de la sras gnyis byon pa las/ gcen po shes rab tshul khrims zhes bya ba ni sngar gyi gzhung dang gdams pa de dag gis thugs yongs su gtams shing rdzu 'phrul la sogs pa'i yon tan bsam gyis mi khyab pa dang ldan pa tshangs par spyod pas mdzes par byas pa zhig go zhes gsung ngo / /de'i gcung po dge ba'i bshes gnyen 'khon dkon mchog rgyal po zhes bya ba ni/ sngar gyi gzhung lugs man ngag dang bcas pa ci rigs pa nos te/ gsang sngags phyi 'gyur la thugs spro bar gyur te/ rtsod pa'i dus kyi thams cad mkhyen par gyur pa bla ma chen po 'brog mi shAkya ye shes dang / sgyur byed dam pa 'gos khug pa lhas btsas zhes bya ba dang / lung dang rigs pa'i mdzod 'dzin pa kha che paN chen zhes bya ba dang / uDyan gyi paNDi ta rnal 'byor gyi dbang phyug dpal ldan shes rab gsang ba zhes bya ba dang / dge ba'i bshes gnyen mchims lo tsA la sogs pa'i drung du bsnyen te gsang sngags dang pha rol tu phyin pa'i gzhung lugs de rnams la/ ji snyed mnga' ba ma lus pa thams cad thugs su chud par mdzad do/ /de'i sras byang chub sems dpa' chen po snying po'i zhabs can yin te/ /'di ni 'gro ba thams cad kyi yid du 'ong zhing