[A:79]shin tu mdzes la dus mnyam pa'i 'gro ba thams cad kyis 'gran par bya ba ma yin pa nyid dang / gzhan yang thog ma nyid nas zhi zhing dul la blo gros dang ldan zhing / yid gzhungs pa dang / snying rje chen po dang / 'dzum pa'i bzhin dang / gsal bar brda phrad par smra zhing nga lo bde la brtson 'grus dang brtun pa dang / spobs pa phun sum tshogs pa dang ldan zhing / bla ma dang rgan pa rnams la gus la gzhon pa dang sdug bsngal ba rnams la byams pa'i rang bzhin can yin pa dang / gzhan yang rgyal po dang / blon po'i lugs kyi bstan bcos la sogs pa dang / yan lag brgyad pa la sogs pa gso dpyad kyi gzhung lugs mtha' dag gis kyang gzhan la phan nye bar 'dogs pa'i rang bzhin can yin te/ 'di ni nges par byang chub sems dpa' lag na padmo'i sprul pa'o zhes rgyu mtshan dang bcas te gsal bar thos so/ /byang chub sems dpa' 'dis rdo rje theg pa'i gzhung lugs la rgyud sde bzhir grags pa mtha' dag thugs su chud par mdzad do/ /rgyud sde rin po che re re'i 'grel pa la sogs pa dang cha lag du mas brgyan pa mnga' ba ni brjod par mi nus mod/ phyogs gcig dper brjod na/ /rnal 'byor gyi rgyud la de nyid bsdus pa'i rgyud kyi 'grel pa de nyid snang ba gzhung stong phrag bcu gnyis pa dang / dpal mchog dang po stong phrag nyi shu rtsa lnga pa dang / ko sa la'i rgyan stong phrag bcu bzhi pa la sogs pa bsam gyis mi khyab pa dang / gzhan yang pha rol tu phyin pa'i gzhung lugs la mdo sde dkon mchog brtsegs pa dang / 'phags pa sangs rgyas phal po che'i gzhung rab tu dbye ba dang / bcom ldan 'das byams pa'i chos lnga 'grel pa dang bcas pa rnams dang / brgyad stong pa dang / nyi khri snang ba dang / shes rab kyi pha rol tu phyin pa'i don bsdus te de thams cad 'grel pa dang bcas pa dang / ratna a ka ra shAnti pa'i pha rol tu phyin pa'i gzhung