[A:122]gang byung / der go cha che shos cig na re/ 'o cag gi zhu ba la tshar ba min/ da lta rang bzhud pa yin sku khams ldog 'ong zer song / der nye gnas kyis phyi nas sgo lcags bcug ste/ tsog ge pa cig la mnal log pas/ mnal lam du mi skya shar tshan cig byung ste/ phyag 'tshal/ phyag rten phul nas gral mgo ma na re/ chos rje pa skye rga na 'chi'i chu bo bzhi po 'dis sems can thams cad sdug bsngal bar mi gda' ye zer/ de de bzhin 'dug gsungs pas/ 'o na 'di la phan pa'i gsol 'debs 'dra bdog ge zer bas 'o na 'di bzhin du gsol ba thob gsung / skye ba skye ba med pa'i tshul rtogs kyang / /da dung skye ba'i gzeb las bdag ma grol/ /skye ba kun du skye bar skye 'gyur ba'i/ /skye ngan bdag gi skye ba'i skyabs mdzod cig /gyis la gsol ba thob gsungs pas/ 'o na rga ba la sogs pa la yang de bzhin du sbyar bas 'chi bar mi gda' ye zer/ 'o na go 'dug snyam ste/ phyag re 'tshal nas thugs la btags zer song ba rmis te/ mnal sad de bsams pas de bzhin du 'ong bar 'dug gsungs so/ /bstan bcos rtsom pa'i tshul la/ phan pa dang sdeb sbyor gtso bor mdzad pa gnyis las phan pa gtso bor mdzad pa yang tshig dang don la skyon med cing 'brel chags pa'i ngag gis mdo rgyud dang mthun par brjod bya gsal bar ston cing de la yang mkhas pa rnams kyis skyon gdags par mi nus la ngo mtshar du 'dzin pa kho na yin no/ /sdeb sbyor gtso bor mdzad pa dang bde bar gshegs pa'i bstod pa dang / thugs rje la bskul ba dang / legs par bshad pa la sogs pa tshig don bsdebs legs shing dpe dang don mi 'gal ba/ lci yang dang ring thung la sogs pa legs par phyed cing tshig gi rgyan dang / ngal bso ba'i gnas la sogs pas mdzes par byas pas/ rtsom pa'i phreng ba mchog tu gyur pa mdzad pa rnams ni brjod pa bde zhing rna bar snyan la yid du 'ong