[A:123]ba yin te/ gser gyi rgyan rin po che padma rA ga dang indra nI la la sogs pas spras pa/ mu tig gi phreng bas bskor zhing blta na sdug pa bas kyang mchog tu mdzes pa'i rtsom pa'i phreng ba rnams ni mthong shing thos pa na/ mkhas pa rnams kyi yid dga' ba skye zhing blo gsal rnams kyi kha rgyan du gyur la shes ldan rnams yid smon gyi gnas su byed pa sha stag mdzad pa yin no/ /'di'i rtsod pa'i tshul ni mtshungs pa med pa'i blo gros dang ldan zhing 'jigs pa med pa'i spobs pa brnyes nas phyin ci ma log pa'i gzhung lugs mkhyen pas rnam par dag pa'i ngag gis smras te/ skyon med pa'i dam bca' brjod cing / bzlog par mi nus pa'i thal ba 'phen pas phas rgol gyi spobs pa myur du 'joms pa yin te/ rang gi sde pa la bod kyi blo gsal mkhas pa chen por rlom zhing / smra ba por grags pa du ma yang pham par mdzad cing / rgya gar gyi paNDi ta 'ga' zhig kyang zil gyis mnan la/ gzhan gyi sde pa 'phrog byed dga' bo la sogs pa phyi rol pa'i mkhas pa drug kyang spobs pa med par byas nas lta ba mchog la btsud pa yin no/ /de ltar dgung lo drug cu re gsum pa'i bar du bod du bzhugs nas/ rim gnyis zab mo'i thugs dam la rtag tu mnyam gzhag gi ngang nas chos 'chad pa dang / rtsod pa dang / rtsom pas dus 'da' bar byed cing / sangs rgyas kyi bstan pa nam langs pa la nyi ma shar ba lta bu mdzad pa'i dbang gis dzambu gling thams cad du mkhas pa'i grags pas khyab pa dang / bla ma rje btsun chen pos dus phyis byang phyogs kyi rgyal khams nas/ mi skad rigs mi gcig pa zhwa khra 'phur ba 'dra ba gyon pa/ lhwam phag pa'i sna 'dra ba gyon pas khyod gdan 'dren du 'ong ba yin/ de'i dus su the tshom ma byed par song dang sangs rgyas kyi bstan pa la phan pa rgya chen po 'byung zhes lung bstan pa dang / rgyal po go dan gyis chos rje'i sku'i snyan pa'i grags pa