[A:125]dkar po'i phyogs kyis byas pa'ang srid/ /'byung bzhi dag gis bskyed pa'ang yod/ /'phags pa gsum gyi ring bsrel ni/ /yon tan stobs kyis 'byung ba ste/ /'byung khungs nas byung ring bsrel yin/ /de la grangs ni brtsi ru med/ /mi 'grib 'phel ba'i ring bsrel yin/ /zhes bya ba yin pas/ nga la rten byon na grangs brtsi ru med pa cig 'byon pa yin pas khyod rang tshags gyis la dar 'dis de'i na bza' gyis gsungs/ ngas ku re byas pa yin/ mi la ma zlo sdig pa bsog pa'i rgyu yin gsung / de nas dgung lo drug cu rtsa lnga bzhes pa'i dus su/ me pho rta'i lo zla ba brgyad pa la byang ngos ling chur gdan phebs/ de'i dus su rgyal bu go dan/ gu yug gan rgyal sar bton pa la hor yul du bzhud nas/ tshur byon pa dang lug lo zla ba gcig pa la mjal/ rgyal bu yang shin tu mnyes nas chos dang 'jig rten gyi gsung gleng mang po yang mdzad par gda'/ de'i gong na rgyal po'i drung du/ bod kyi bande yang 'ga' re 'dug pa la/ sangs rgyas kyi chos kyi yon tan gyi khyad par gang yang bskyed par ma nus nas/ smon lam 'debs pa la dbang bar khas len pa 'tshogs pa'i dus su/ erka 'un dang / hor gyi lha pa gral mgor 'jog pa yod par 'dug /de nas rgyal bu dang bla ma chos rje pa chos kyi gsung gleng mang po mdzad pa la ma go ba'i skabs su/ yu gur gyi dge ba'i bshes gnyen mkhas pa mang pos kyang mtshams sbyor byas nas chos kyi don thams cad legs par gor bcug pas rgyal bu yang shin tu mnyes par byung nas de ring phyin chad erka 'un dang / lha pa tsho bande'i gral mgor ma sdod/ thams cad kyi gral mgor bla ma chos rje pa bzhugs la/ smon lam 'debs pa'i dus su sngon la bande'i smon lam thob gsungs pa'i lung byon nas hor gyi rgyal khams