[A:119]nas kyang lung rtogs kyi yon tan bsam gyis mi khyab pa rgyud la 'khrungs pa yin te/ chos kyi rje nyid kyi gsung las kho bo yang gzhon pa'i dus su bla ma'i rnal 'byor gyi byin rlabs zhus pas khyod kyis sangs rgyas kyi 'du shes mi skye/ khu bo'i 'du shes skye/ lus longs spyod kyis bla ma'i phyogs su dka' thub mi nus gsungs nas ma gnang / phyis 'chi ltas 'jigs pa cig byung / khams kyang ma bde/ de'i skabs su chos rje rin po che la sku khams ma bde ba zhag 'ga' byung / der nyin mtshan rgyun mi chad par gnyid dang kha zas kyi 'du shes ma byas par zhabs tog byas/ des sdig pa cung zad dag pa 'dra/ de na bla ma'i rnal 'byor 'di gnang bas bla ma la sangs rgyas kyi 'du shes skyes/ sangs rgyas thams cad kyi ngo bo 'phags pa 'jam dpal du mthong / mos gus thun mong ma yin pa skyes/ de nyid kyis 'chi ltas las grol/ khams shin tu bde/ de nas sgra/ tshad ma/ snyan ngag /sdeb sbyor/ tshig gi rgyan/ gsang sngags/ pha rol tu phyin pa/ mngon pa/ 'dul ba la sogs pa'i lung dang rigs pa'i gnad rnams phyin ci ma log par gzod go /sde snod thams cad la mi 'jigs pa'i spobs pa thob/ lha 'dre mi gsum yang thams cad byams par byung / rgya gar gyi rgyal po la sogs pa nga rgyal can thams cad kyang / nged la chos zhu zer nas rtsis byed pa gzod byung / nang du yang dag pa'i rtog pa cung zad kyang skyes/ de'i tshe kho bo la phan par bya ba'i don du rten 'brel 'grig par bya ba'i phyir bsnyung ba'i tshul bstan pa yin gyi dngos ma yin par snang / gzhan gyis kyang de ltar byas na rten 'brel phyin ci ma log par 'grig par 'gyur ba the tshom mi za'o zhes 'byung ba dang / gzhan yang dngos su 'jam pa'i dbyangs dang / mi g.yo mgon po dang / sgrol ma la sogs par gzigs shing / dbugs dbyung nas chos kyi sgo du ma yang bstan la/ de la brten nas ting nge 'dzin