[A:306]bdag nyid chen pos zin shing btul ba'i tshigs su bcad pa las/ de blo dag pa lcags kyi khams/ /yang dag gsungs pa'i bstan pa yis/ /gser 'gyur rtsi yis rab sbyangs nas/ /thub pa'i brtul zhugs legs 'dzin pa'i/ /sngom brtson dam par bdag gis bsgyur/ /zhes gsungs pa yin no/ /de'i tshe bdag nyid chen po 'di'i grags pa dang / snyan pa dang / sgra dang tshigs su bcad pa des phyogs kyi tha gru thams cad rgyas par khyab par gyur to/ /de nas shar phyogs kyi rgyal khams chen po rnams su rgyal ba'i bstan pa dar bar mdzad cing / 'gro ba dpag tu med pa'i don mdzad nas/ slar yang kha ba can pa rnams la thugs rjes gzigs shing / gdan sa chen po nas gsol ba 'debs pa rnams la thugs brtse bar dgongs nas/ bod kyi yul dang / gdan sa chen por rim gyis byon te/ de dag rnams kyi lam du yang gdul bya dpag tu med pa'i rgyud smin cing grol bar mdzad do/ /de'i tshe bdag nyid kyi phyag tu longs spyod kyi dngos po bzang zhing rgya che ba byung ba rnams la/ 'ga' zhig ni rdo rje gdan la sogs pa'i gnas khyad par du 'phags pa rnams dang / mchod par 'os pa rnams la mchod pa'i rdzas su phul la/ 'ga' zhig ni gtsug lag khang dang de bzhin gshegs pa'i sku du ma bzhugs pa'i mchod rten rin po che du ma las grub pa'i sgo mang shin tu mtshar zhing rgya che ba rgyab yol dang bcas pa bzhengs pa dang / bla ma gong ma rnams kyi sku 'bum la gser gyi gdugs chos 'khor la sogs pa mdzad do/ /'ga' zhig ni de bzhin gshegs pa'i gsung rab du ma rin po che las bzhengs so/ /'ga' zhig ni dge 'dun du ma'i mchod pa'i rgyun nar mar mdzad cing / 'ga' zhig ni dge sbyong dang / bram ze dang / phongs pa rnams la sbyin pa rgya chen po mdzad de/ bdag nyid kyi don du yongs su ma bzung zhing gzhan gyi don kho nar mdzad do/ /de ltar bdag nyid chen po 'di gdan sar phebs pa'i mod la sa chen po 'di yang