[A:307]dga' zhing mgu la rangs pas rnam pa drug tu g.yo zhing / gser sbram chen po la sogs pa rin po che du ma yang sa'i steng du 'thon par byed/ lo thog rnam pa sna tshogs pa dag kyang smin par byed/ nyi ma'i dkyil 'khor yang 'od kyi dra ba gsal bar 'byin par gyur/ skye dgu thams cad kyang rdzogs ldan gyi dus bzhin slar yang 'byor par gyur te/ skye bo thams cad chos nyan pa la mngon par dga' zhing / yul dbus kyi paNDi ta chen po du ma 'dus te/ bod kyi sde snod 'dzin pa thams cad kyis kyang gsol ba btab nas/ bdag nyid chen po 'dis theg pa chen po'i chos kyi 'khor lo rgya chen po bskor zhing kha ba can na gnas pa'i 'gro ba phal mo che smin cing grol bar mdzad do/ /de ltar bdag nyid chen po 'dis chos dang zang zing gi sbyin pa rdzogs ldan gyi dus kyi sprin chen po lta bu phab pas/ snyigs ma'i dus kyi 'gro ba thams cad kyi skyabs gnas dam par gyur pa yin no/ /de tshe sa steng chos dang zang zing gis/ /dpal 'byor bzang po phun sum tshogs mthong nas/ /gong ma'i lha rnams shin tu ngo mtshar zhing / /snyigs ma'i dus la yid ni som nyir gyur/ /de ltar bdag nyid chen po 'di ni/ chos kyi rje las thos pa yongs su rdzogs shing / chos kyi mnga' bdag chen por gyur pa yin na yang / bdag nyid nga rgyal med cing chos la gus pas bsten pa dang / legs bshad byis pa dag las kyang / /dam pa rnams kyis len par byed/ /ces 'byung ba'i rnam par thar pas dam pa'i chos gsan pa'i tshul bstan pa ni/ kha che'i paNDi ta shrI ta thA ga ta bha dra zhes bya ba las/ sngon gyi slob dpon sarba dharmA zhes bya bas mdzad pa'i sgra'i bstan bcos ka lA pa mtshams sbyor gyi rab tu byed pa le'u drug /bram ze'i slob dpon u gra bhu ti zhes bya bas mdzad pa'i slob ma la phan pa zhes bya ba'i 'grel pa dang bcas pa legs par bslabs nas/ khams sgrub pa ti ngan ti dang /