[A:327]mchog rigs bsdus pa'i dkyil 'khor du dbang bskur ba dang / yang de nyid las rdo rje 'jigs byed lha bcu bdun ma'i sgrub thabs/ mtshan ma gyen 'greng gi man ngag /rwa la sems gzung ba'i man ngag /gtor ma'i cho ga slob dpon la li ta badzras mdzad pa rnams gsan no/ /yang slob dpon dge ba'i bshes gnyen spyil phu ba las/ slob dpon blo gros brtan pas mdzad pa'i sum cu pa'i 'grel pa/ slob dpon btsun pa ngo bo nyid med pas mdzad pa'i mdo sde rgyan gyi 'grel bshad rnams gsan no/ /de lta bu'i chos kyi tshul de dag ji ltar brgyud pa'i rim pa ni/ de nyid kyis mdzad pa'i dkar chag las gsal bar bzhugs pas 'dir ma bris so/ /de ltar dge ba'i bshes gnyen du ma las rim par brgyud de byon pa'i dam pa'i chos zab pa dang rgya che ba'i chu klung grangs med pa thams cad chos kyi rgya mtsho chen por ro gcig tu gyur te/ thos pa'i mdzod 'dzin chen po bzung nas sangs rgyas kyi bstan pa'i rtsa lag gcig pur gyur pa yin te/ 'di nyid kyi zhal nas/ tshul khrims dag pa'i gzhi brtan zhing / /mang du thos pa'i chu gter can/ /'phags pa'i blo gros rgya mtsho las/ /zhes gsungs pa yin no/ /'di ni bdag nyid chen po de dam pa'i chos gsan pa 'di nyid kyis mdo tsam smos pa yin gyi rgyas par ni tshad med par shes par bya'o/ /de lta bu'i bdag nyid chen po 'dis kha ba can na gnas pa'i sems can du ma smin cing grol bar mdzad de/ slar yang sa'i bdag po'i gdan 'dren pa'i pho nya du ma byung zhing / shar phyogs na gnas pa'i gdul bya dpag tu med pa la thugs rjes gzigs nas/ sa'i bdag po rgyal po chen po bzhugs pa'i gnas/ bod kyi yul nas dpag tshad brgya phrag mang po'i lam shin tu bgrod dka' ba'i chu bo du ma dang / thang dang / ri'i rgyud du ma dang / 'phrang la sogs pa du ma las brgal te/ rim gyis sems can du ma la chos ston cing nyi 'og gi rgyal khams