[A:328]rnams su slob ma'i tshogs dang bcas pa byon par gyur to/ /'di ni byang chub sems dpa' sems dpa' chen po rnams kyi rnam par thar pa yin te/ bcom ldan 'das kyis mdo sde dag las/ byang chub sems dpa' ni dpag tshad brgya'i pha rol dag tu yang sems can rnams la chos ston du 'gro zhes gsungs pa yin no/ /de'i tshe rgyal po chen po dang / de'i sras kyi thu bo rgyal tshab dam pa byang chub sems dpa' jim gyim dang / btsun mo dang / blon po'i tshogs chen po dang bcas pa thams cad kyis rgya gar gyi glang po che la rin po che'i dra bas spras pa'i khri dang / rin po che'i za ra tshags mngon par 'phyang ba'i gdugs dang / rgyal mtshan dang / ba dan dang / rol mo'i tshogs rgya chen po du ma dang bcas pa rgyal po'i 'byor pa chen pos bsu ba dang / mchod pa'i khyad par dpag tu med pa mdzad cing pho brang chen por gdan drangs nas/ zab pa dang rgya che ba'i chos kyi tshul du ma zhus shing / sangs rgyas kyi bstan pa me tog ku mu da'i tshal la zla ba'i 'od zer shar ba ltar ches cher gsal bar mdzad do/ /de'i tshe rgya ban la sogs pa gos nag po gyon pa rnams ni/ rgya gar gyi sdom pa rnam par dag pa phog nas chos gos ngur smrig 'dzin par bsgyur zhing / sa'i steng thams cad mchod rten dang / gtsug lag khang dang / ngur smrig gi rgyal mtshan 'dzin pas khyab par gyur te/ de ltar yon mchod chen po gnyis kyis sangs rgyas kyi bstan pa ni/ de bzhin gshegs pa bzhugs pa'i dus la 'gran pa bzhin gsal bar byas par gyur to/ /de'i tshe sa'i bdag po chen po bzhugs pa'i gnas nyi 'og gi rgyal khams chen po rnams su sangs rgyas kyi bstan pa'i bya ba dang / gdul bya dpag tu med pa'i don mdzad nas/ slar yang kha ba can pa rnams la thugs rjes gzigs shing / thugs brtse bar dgongs nas slob ma'i tshogs rgya chen po dang / sa'i bdag po rgyal po'i sras rgyal bu a rog che zhes bya ba dpung gi tshogs rgya