[A:331]pa 'phags pas byang chub kyi mchog tu sems bskyed pa gnang zhing / de dag thams cad kyang bla na med pa'i byang chub tu nges pa mdzad pa yin te/ 'di nyid kyis bstan pa'i rtsis mdzad pa las skye bo phal pa dang bcas pa 'bum du longs la/ dge slong rdo rje 'dzin pa 'phags pas byang chub kyi mchog tu sems bskyed par byas pa'i nyin par bstan pa'i rtsis 'di yang yi ger bris shig ces 'byung ba yin no/ /de ltar 'gro ba dpag tu med pa'i don mdzad cing / rim gyis gdan sa chen por byon nas/ de bzhin gshegs pa'i gsung rab mdo sde la sogs pa bod du 'gyur ba rnams la dus phyis yi ge dang / brda dang / tha snyad dang / go rims log par gyur par rnams/ yi ge dang / brda dang / tha snyad legs par bcos te/ shin tu dag par byas nas go rims la sogs pa legs par bsgrigs shing / de dag thams cad dbus gtsang gi yig mkhan mkhas pa thams cad bsags nas/ rgya yul nas byung ba'i shog sngon gya nom pa la rin po che gser gyis bzhengs shing / de dag so so la'ang gser gyi glegs shing / nyi 'og gi gos gya nom pa'i na bza' la sogs pas spras par mdzad de/ bka' bsdu ba gsum pa lta bu mdzad pa yin no/ /de lta bu'i skyes bu dam pa 'dis sngon gyi slob dpon klu sgrub la sogs pa dang mthun par bstan bcos dang / spring yig dang / gdams pa la sogs pa mang du mdzad do/ /'di ltar sa'i bdag po chen po rgyal po chen po la gdams pa'i rab tu byed pa dang / rgyal po jim gyim gyis bskul nas mngon pa'i bstan bcos chen po shes bya rab tu gsal ba dang / rgyal bu mang ga la la gdams pa bkra shis kyi phreng ba dang / rgyal bu ji big la gtam du byed pa nor bu'i phreng ba dang / rgyal bu mo no gan la spring yig shlo ka brgya rtsa brgyad pa la sogs pa rgyal brgyud du ma dang / slob ma du ma la so so'i bsam pa dang mthun par spring yig la sogs pa gdams pa du ma mdzad cing de dag so so'i