[A:333]rakShi ta la bla ma sa skya pa chen po'i rnam par thar pa la sogs gsungs nas/ bla ma dam pa de rnams la yon tan gyi phung po de lta bu mnga' zhing / bstan pa'i bya ba de lta bu mdzad pa yin la/ ngas kyang bstan pa'i bya ba dang / sems can la phan pa ci nus kyi tshul du bsgrub pa yin pas/ da ni khyod kyis kyang de bzhin du byed dgos pa yin pas go bar gyis shig ces gsungs so/ /de nas mya ngan las 'da' ba chen po ston pa'i dus dang nye bar gyur pa na/ bstan pa la dga' ba'i lha rnams kyis mngon par shes pas shes te/ skyes bu dam pa 'di lta bu mi bzhugs na rgyal ba'i bstan pa sus 'dzin zhes mi dga' zhing mya ngan gyis mngon par non pa'i yid kyis ngu ba'i mchi ma'i char gyis sa gzhi chen po yang bangs par gyur te/ bya'i kha dog phyin ci log pa la sogs pa du ma yang ston par gyur/ nyi ma'i dkyil 'khor yang 'od zer mi gsal zhing / dus tshigs dang rgyu skar yang log par rgyu bar gyur/ skye dgu thams cad yid rnam par 'khrug cing myos nas bya ba dang bya ba ma yin pa mi shes shing phyogs bslad pa bzhin du gyur/ spong ba bsam gtan pa rnams kyang sny-ing yed yed por gyur te/ sems rtse gcig pa mi thob cing / nyan bshad byed pa rnams kyang nyan bshad la spro ba med par bya ba ma yin pa gzhan dag la 'jug par mos par gyur/ sa'i lha yang spro ba med pas lo tog gi khyad par rnams kyang smin par ma gyur to/ /nyi ma'i dkyil 'khor 'od kyi dra ba can/ /nub kyi ri rtse'i nye bar gyur pa na/ /grib ma'i tshogs rnams mngon sum 'ongs pa bzhin/ /bdag nyid chen po yon tan ldan pa'i thugs/ /gzhan du bzhud par dgongs pa'i mod la yang / /snga ltas de dag glo bur lhags par gyur/ /de lta bu ci'i phyir 'byung zhe na/ gang zag dam pa rnams gzhan du bzhud par dgongs pa na/ snga ltas de lta bu 'byung ba ni chos nyid yin te/ skye dgu thams cad kyi bde ba dang