[A:334]skyid pa'i khyad par thams cad skyes bu dam pa 'di lta bu las 'byung ba yin la 'di ni gzhan du bzhud par dgongs pa'i phyir ro/ /de'i tshe skye dgu rnams la de lta bu'i ltas ngan byung la/ bdag nyid chen po ni bde ba can na de bzhin gshegs pa a mi tA bha wa/ padma rA ga'i ri bo ltar kun nas brjid pa'i zhabs kyi drung na/ byang chub sems dpa'i tshogs du ma kun tu bzang po'i mchod pa'i sprin gyi phung po chen pos mchod pa byed pa la sogs pa sangs rgyas kyi zhing rnam par dag pa du ma'i bkod pa thugs dam du gzigs pa'i snang ba byung la/ khyad par du 'brug lo zla ba bcu pa'i tshes gsum gyi mtshan mo la/ dpal gyi ri la slob dpon chen po klu sgrub byang chub kyi shing rgya dang tshad gzhal bar dka' ba'i zhabs kyi drung na bzhugs pa la/ bdag nyid dbu ma rigs pa'i tshogs drug la sogs pa gsan cing / nam mkha' la lha'i bu mo du mas mchod pa'i khyad par dpag tu med pas mchod pa byed pa dang / rig pa'i rgyal mo rma bya chen mo mngon sum du bzhugs pa rnams rmi lam du gsal bar byung zhes gsungs nas/ de'i rnam par thar pa ni ma 'ongs pa'i sems can rnams la phan par dgongs nas/ bdag nyid chen po nyid kyis ji lta ba bzhin zhal ta mdzad nas bris pa/ dad pa can rnams dad pas thag ring po nas blta zhing phyag 'tshal ba'i yul khang gsar gyi gzims khang gi gyen logs la mchod pa'i tshogs rgya chen pos spras pa thams cad mngon sum du bzhugs pa yin no/ /gzhan yang de lta bu la sogs pa ngo mtshar ba'i tshul du mas nyin mtshan 'da' bar byed cing / bla ma chos kyi rje'i dus kyi mchod pa/ yang zla ba bcu pa de nyid nas bzung ste shin tu gya nom par mdzad do/ /de'i tshe drung na bzhugs pa rnams kyis bla ma chos kyi rje'i dus kyi mchod pa 'di sngar nas zla ba bcu gcig pa la mdzad pa ma lags sam zhes zhus pas/ yin mod kyi bla ma chos kyi rje la gsol ba 'debs pa ni zla ba re tsam byed par dam bca' yin la/ bcu gcig pa'i zla ba tshang bar