[A:335]maNDal 'bul ba la sogs pa ma byung gis dogs nas bsu ba yin mod gsungs/ de bas zla ba bcu pa'i tshes bco brgyad kyi bar du tshogs su byon zhing chos kyang gsungs la/ bco brgyad dang / bcu dgu dang / nyi shu gcig rnams la ni gzims khang nyid du bzhugs par gyur to/ /de nas nyi shu gnyis kyi snga dro'i cha la mchod pa'i tshogs rgya chen po shom gsungs nas/ rdo rje dril bu bsnams te/ rtag 'dzin can rnams kyi rtag par 'dzin pa'i log rtog bsal ba dang / le lo can rnams brtson 'grus chen po la bskul ba dang / des 'dul ba'i sems can rnams 'dul ba'i phyir nam mkha' las sgra dang / 'od dang / me tog gi char 'babs pa la sogs pa ngo mtshar ba'i ltas du ma dang bcas pas yongs su mya ngan las 'das pa chen po'i tshul bstan par gyur to/ /de tshe rgya mtsho'i mtha' klas sa ni g.yos gyur cig /nam mkha' las kyang sil snyan du ma'i sgra/ /kun nas sgrogs shing spos dang me tog char/ /rnam pa sna tshogs lding zhing 'bab par gyur/ /kye ma kye hud lhun po lta bur gzi che ba/ /yon tan gser ri'i phreng bas 'khrigs pa po/ /mtshan dang dpe byad 'bar bas spras pa'i sku/ /chos dbyings rgya mtsho'i ngang du nub par gyur/ /kye hud stong nyid zab mo'i 'brug sgrogs pa/ /gsung rab du ma'i char rgyun 'bebs pa po/ /spobs pa'i glog phreng rgyu bas brgyan pa yi/ /chos kyi sprin de gzhan du g.yos par gyur/ /kye hud sngon sbyangs rgya mtsho las 'khrungs pa/ /dngos grub ma lus kun nas stsol ba po/ /bstan pa'i rgyal mtshan kun nas mdzes byed pa/ /yid bzhin nor bu chen po deng 'dir stor/ /kye hud snying rje'i rtsa ba rab brtan pa/ /'dod dgu'i 'bras bu ma lus 'byung ba po/ /gzhan don 'byor pa'i yal ga phun tshogs pa/ /dpag bsam shing de 'dir ni mi snang gyur/ /kye ma kye hud nyi ma'i dkyil 'khor ltar/ /legs par bshad pa'i 'od zer