[A:336]stong 'byin pa/ /skye dgu'i sgron ma de ni nub gyur pas/ /'dir ni sa stengs cig car mun par gyur/ /kye ma kye hud zla ba nya 'dra'i zhal/ /gsung rab bdud rtsi'i bsil zer 'byin pa po/ /utpal 'dab 'dra'i spyan gyis mdzes byas pa/ /slan chad skye bos mthong bar yongs mi 'gyur/ /de ltar bdag nyid chen po zhi bar gshegs pa'i sku la/ mchod pa'i tshogs dpag tu med pa 'bul zhing gsol ba gdab snyam pa la/ bdag gi rmi lam du bla ma dam pa byon nas nga'i phung po de de tsam du bzhag nas ci byed/ da me la sregs gsung pa'i snang ba byung nas/ spos kyi phung po chen po bsogs te/ zhi bar gshegs nas zhag bdun cu lon pa'i tshe/ a ka ru nag po dang tsandan dkar dmar la sogs pa/ gzhan yang spos kyi shing gya nom pa'i me'i phung po chen po la gdan drangs pa na/ de'i sku la mes reg ma nus par gyur to/ /de yi sku ni gzi brjid che ba yis/ /me yi tshogs ni nye bar ma nus pa'am/ /yang na de nyid zhi bar gshegs mthong nas/ /me tshogs de dag mya ngan byed pa bzhin/ /de nas nye gnas zhang btsun la sogs pa ya mtshan du gyur te/ 'di'i sku la me mi 'bar na da ji ltar bya zhes zer zhing rtab rtab por gyur to/ /de'i tshe zhang btsun na re/ bla ma ye khyed mos gus che ba yin gyis gsol ba thob dang gsungs nas/ kho bos bla ma brgyud pa dang bcas pa rnams la gus pas rtse gcig tu gsol ba btab pa'i tshe/ me tog phul ma thag tu spos kyi shing de dag las me lce rab tu 'bar ba dang bcas pa'i tshogs dri zhim po dang bcas pas mchod pa byas par gyur to/ /de'i tshe 'dus pa thams cad kyang shin tu ngo mtshar bar gyur to/ /de tshe me ni padma rgyas 'dra'i steng / /'phags pa'i sku ni gsal bar bzhugs mthong nas/ /de dag ngo mtshar gyur cing mya ngan gyis/ /mig ni mchi mas kun du gang bar gyur/ /de nas rim gyis mkha' 'gro ma rdo rje gur nas ji ltar 'byung ba bzhin du gdung gi phreng ba