[A:297]dus bzhin kun nas 'byor par gyur/ /de nas gzhon nu de nyid nyin re bzhin yang gzi brjid je che je cher 'khrungs pa ni/ zla ba yar gyi ngo la 'gran pa bzhin du gyur/ sngon gyi gnas du ma dran pa'i mngon par shes pa dang ni ldan/ blo gros dang dbang po shin tu gsal zhing dngas pa ni 'jig rten na dpe las 'das/ 'jig rten pa thams cad kyis nyin re zhing yang blta bas mi ngoms pas dus gsum du blta zhing phyag byed la/ 'jig rten du 'di lta bu'i sems can dag pa 'khrungs so zhes sgrogs par gyur to/ /de nas gzhon nu de cung zad yar 'khrungs pa dang / rang gi mngon par shes pa'i stobs kyis sngon gyi gnas du ma dran pa dag rang gi slob ma'i tshogs dang / sde snod 'dzin pa'i mkhas pa rnams dang / skye bo gzhan la yang ston par mdzad de/ 'di ltar rgya gar gyi yul du paNDi ta chen po du ma'i rnam pas sems can du ma'i don mdzad pa dang / rgyal ba'i bstan pa la bya ba 'di ltar mdzad ces pa la sogs pa rnam pa dang bcas gtan tshigs dang bcas pa du ma gsal bar gsungs so/ /bod kyi yul 'dir ni skyid grong gi sa'i char/ 'jig rten dbang phyug dang gsung gleng mdzad par grags pa 'jig rten dang 'jig rten las 'das pa'i yon tan du ma la dbang 'byor pa/ yongs kyi dge ba'i bshes gnyen sa ston ri pa zhes bya bar grags pa byon pa de ni/ bdag nyid chen po 'di'i sku tshe snga ma yin te/ 'di nyid kyis kyang yang dang yang du gsung pa dang / gang zag dam pa rnams kyis kyang lung bstan pa'i phyir ro/ /yang de ltar cis mngon zhe na/ sa ston ri pa'i slob ma gnyis kyis bdag cag gi bla ma sa skyar sku 'khrungs 'dug zer ba thos pas bltar 'ong ba dang / bdag nyid chen po 'di byis pa'i khrod na rtse zhing bzhugs pas mkhyen nas/ khyed gnyis 'ongs sam zhes gsungs pas/ khong gnyis kyis nged