[A:296]pa rgya chen po gtong ba la spro ba dang / chos kyi don zab cing rgya che ba dag kyang mngon par byed cing / sngon chad ma myong ba'i lus dang sems shin tu bde ba'i khyad par dag gis nyin mtshan 'da' bar byed do/ /de nas rim gyis bltams pa'i dus dang nye bar gyur pa na/ dpyid kyi dus la bab pa na/ sa gzhi yang baiDUrya ltar kun nas ljang ba'i rtsa'i myu gu gsar pa'i gos ni gyon/ me tog rnam pa sna tshogs pa ni ched du bsham pa bzhin/ bung ba ches phra ba mang po ni sgra di ri ri zer/ bya'i tshogs du ma ni yid du 'ong ba'i sgra sgrogs/ nyi ma yang dal bus rgyu bas 'od kyi dra ba gsal bar 'byin cing mngon par zhen par gyur pa lta bu na/ tshes grangs dang rgyu skar bzang po la babs par gyur pa'i tshe yum la yang gnod pa med cing ngo mtshar ba'i ltas du ma dang bcas pas bde bar bltams so/ /de ltar bltams pa'i tshe sa chen po rgya mtsho'i mtha' klas pa 'di yang dal bus g.yo zhing / nam mkha' las kyang lha'i bu rnams rol mo'i sgra snyan cing 'jam pa dag 'byin la/ me tog dang spos kyi chu dri zhim po 'dres pa'i char dag kyang 'bab par byed/ 'od zer kha dog du ma'i dra ba dag gis kyang phyogs kyi tha gru gsal bar byed pa la sogs pa 'phags pa rnams ji ltar bltams pa'i lugs dang mthun par bdag nyid chen po 'di yang 'khrungs pas na mtshan yang de skad ces bya'o/ /de ltar thub pas lung bstan 'phags pa'i mchog /sems can dag pa de ni 'dir byon pas/ /nyi ma'i dkyil 'khor slar yang shar ba bzhin/ /phyogs kyi tha gru 'od kyi dra bas khyab/ /de tshe mkha' la lha yi me tog char/ /spos chu 'dren pa slar yang 'bab gyur cing / /yid 'ong sil snyan du ma'i sgra 'byin la/ /sa gzhi rir bcas dga' bas g.yo bar gyur/ /de tshe sa stengs rims nad khrag 'khrug med/ /snod rnams rin chen sman dang 'bru yis gang / /skye dgu 'byor ba'i ya mtshan du ma yis/ /rdzogs ldan