[A:364]byed du bcug pas sla ba 'dug gsungs/ /
'di nyid shar nub la sogs pa'i chos sde'i chags sdang gis dam sel dang khengs grags la sogs pa 'jig rten chos brgyad kyi rnam gzhag spangs pa zhig ste/ bla ma'i thugs kyi sras gcig pur gyur kyang / ku su lu phal pa'i rnam pa/ na bza' tshun chod kyang ngan pa las mi gsol bas/ 'phags pa'i gsung gis/ zhang dkon mchog dpal 'di yang go lag re yang thad ka ri gon pas chog pa la/ mi khyu ru mi chud pa re byed kyin 'dug gsungs te/ chos brgyad kyi bya ba spangs pas rnam par thar pa shin tu gtsang zhing chos la bsre bslad dang / rang bzo med pa bla ma brgyud pa nas brgyud pa'i drung du rim par dka' ba spyad cing / pha dang bu'i tshul du thugs kyi sras su gyur pas byin rlabs kyi drod ma yal ba/ bla ma'i gsung dang / lag len kho na bzhin byed pas chos lugs 'dzin pa kun gyi nang nas zhang pa kho na mchog gcig pu yin gsung / yon tan brnyes tshul la gnyis te/ lung gi yon tan ni/ de yang bla ma dang 'jal ma khad nas gzhung khrid kyi sngon 'gro btsugs te/ mdo khams nas sa skya'i bar la lo gsum 'gor/ de'i bar la khrid rnams rdzogs par mdzad/ de nas rim gyis gzhung bshad dang / man ngag phran tshegs rnams rdzogs par gnang zhing / gzhan yang bde mchog lo nag dril gsum/ dus kyi 'khor lo/ gsang ba 'dus pa 'phags lugs/ zhabs lugs/ sgrol ma phyi nang / gshin rje'i gshed kyi skor la sogs pa/ sa skya pa'i phag mo skor gsum/ lcags ri mi 'da' ba'i zab chos bzhi la sogs pa/ dbang byin rlabs/ rgyud man ngag la sogs pa chos kyi rgyal po nyid la mnga' ba phal mo che gsan cing bskyed rdzogs lag len mthong ba rgyud pa ma nyams pa/ ji lta ba bzhin thugs su chud par mdzad do/ /ting nge 'dzin dang rtogs pa'i yon tan ji ltar brnyes na/ nyin mtshan khor yug tu chos spyod