[A:408]ཡང་ལྷས་བཟུང་བར་ངེས་པ་དང། བཞེངས་ནུས་ཙམ་ནས། ལྷ་སྐུ་དང། གླེགས་བམ་དང། རབ་ཏུ་བྱུང་བའི་ཆ་ལུགས་ཅན་ཁོ་ན་ལ་དགའ་ཞིང་རྩེ་བར་མཛད་པ་དང། གཞོན་ནུ་རང་གི་གོས་ཆུང་ངུ་འགའ་ཞིག་ཤམ་ཐབས་དང། ལ་ལ་ཆོས་གོས་ཡིན་ཟེར་བ་དང། རྩེད་མོའི་གྲོགས་རྣམས་ཆོས་ཉན་དུ་བྱེད་པ་སོགས་ལ་དཔགས་ནས། ཡབ་ཡུམ་གྱི་ས་རབ་ཏུ་བྱུང་བ་ཉིད་དུ་བསྔོ་བགྲང་མཛད་ཅིང། འཚོ་བའི་རྐྱེན་དག་ཀྱང་བྱང་ཆུབ་སེམས་དཔའ་ལ་འོས་པ་དག་ཁོ་ནས་འཚོ་བར་མཛད་དོ༎
དེ་ནས་རིམ་གྱིས་རང་ལོ་བདུན་པ་ལ། ཡི་གེ་པའི་སློབ་དཔོན་གྱིས། ཆོས་ཀྱི་མ་མོ་ཀློག་ཐབས་གྱི་རིམ་པ་དང། དཀོན་མཆོག་གསུམ་རྗེས་སུ་དྲན་པ་སོགས་ཆོས་སྤྱོད་ཀྱི་རིམ་པ་ལ་བསླབ་སྦྱངས་མཛད། དེ་ནས་རང་ལོ་བཅུ་པ་ལ། ཉིད་ཀྱི་ཁུ་བོ་དུས་དེ་ཙམ་ནས་ལུགས་ཀྱི་དགེ་བའི་བཤེས་གཉེན་ཇི་སྙེད་པའི་བླ་མར་གྱུར་པ། སྤྱན་སྔ་ཆོས་ཀྱི་རྗེ་ཀུན་དགའ་རྒྱལ་མཚན་པས་མཁན་པོ་དང། དེའི་ཅུང་སྤྱན་སྔ་ཕུན་ཚོགས་དཔལ་བཟང་པོ་ཞེས་པའི་མཚན་ཅན་མདོ་སྔགས་ཀྱི་གསུང་རབ་མང་པོ་དང། རིགས་པའི་གནས་དུ་མ་ལ་རིགས་ཤིང་གྲོལ་བར་གྱུར་པའི་སྤོབས་པ་ཅན་དེས་ལས་བྱེད་པའི་སློབ་དཔོན་མཛད་ནས། དགེ་བསྙེན་ནས་དགེ་ཚུལ་གྱི་བར་དུ་གྲུབ་པར་མཛད། དེ་ནས་གནས་ཀྱི་སློབ་དཔོན་ནི། རྒྱལ་ལྷ་ཁང་དང། ཆོས་གྲྭ་བདེ་བ་ཅན་གྱི་བཤད་ཉན་པ་ཆེན་པོ་ཕུན་ཚོགས་པས་མཛད་དེ། ཐོག་མར་ཚིག་ལེའུར་བྱས་པ་སུམ་བརྒྱ་པ་རྩ་འགྲེལ་ལ་བསླབ་སྦྱངས་དང། མངོན་པར་རྟོགས་པའི་རྒྱན་རྩ་འགྲེལ་ལ། རྒྱལ་པ་བློ་གྲོས་སེང་གེས་མཛད་པའི་ཚིག་དོན་དང། སྤྱི་དོན་གྱི་སྒོ་ནས་སྒྲིན་འགྲུས་ཆེ་བར་མཛད། རང་ལོ་བཅུ་གཅིག་བཞེས་པའི་ཚེ། རྗེ་ཐམས་ཅད་མཁྱེན་པ་རོང་ཆེན། མཁར་རྩེ་བས་སྤྱན་དྲངས་ཏེ་ཕེབས། ནཱ་ལེནྟྲའི་དགོན་པ་ཕུལ། བསྟན་པ་རིན་པོ་ཆེ་སྤྱི་དགོས་ཐམས་ཅད་ཉི་མ་ཤར་བ་ལྟ་བུར་གྱུར། དེ་ནས་བཟུང་སྟེ་རང་ལོ་བཅུ་