[A:101]པའོ༎ ཞེས་རྗེས་སུ་རྟོགས་སོ༎
མཁས་པའི་སྤྱན་སྔར་ཡིད་དབང་འདྲེན་བྱེད་ནི༎
ལང་ཚོས་མ་ལགས་རིགས་གཟུགས་འབྱོར་པས་མིན༎
ཡོན་ཏན་རྒྱན་ཕྲེང་གསལ་བའི་གཟི་འོད་དེ༎
གང་ལ་མངའ་བ་དཔྱོད་ལྡན་ཤེས་པར་བྱོས༎
སྐྱེ་བར་སྦྱངས་པས་ཤེས་བྱའི་གནས་ཀུན་ལ༎
འབད་པ་ཆུང་ངུས་མཁྱེན་རྟོགས་ཆེར་འཁྲུངས་པ༎
རང་ནོར་བཅོལ་པོ་ལེན་དཔེ་ཇི་ལྟའི་ཚུལ༎
ཡུད་ཀྱིས་མཁས་པའི་འགྲན་བྲལ་གོ་འཕང་བརྙེས༎
ཤུལ་རིངས་འཕགས་པའི་ཡུལ་བྱོན་པཎྜི་ཏ༎
རང་ཚིག་གཟུགས་ཀྱིས་ཚིམ་ཚེ་བརྗོད་བྲལ་བས༎
ལྐུགས་པའི་རྨི་ལམ་ཇི་ལྟའི་ངང་ཉིད་དུ༎
ཞག་མངས་ངལ་བའི་ཁུར་གྱིས་གནོན་བཞིན་བཞུགས༎
དེ་ཚེ་ཕྱོགས་བཅུར་བསྔགས་པའི་བྱ་མ་རྟ༎
ཕྲིན་ཡིག་མགུལ་ཐོགས་འདབ་ཆགས་བུ་ཚོལ་ལྟར༎
ས་མཐའ་ཡོངས་སུ་ཉུལ་ཡང་མུན་པའི་རུམ༎
གངས་ཁྲོད་རང་གི་དེ་ཉིད་གསལ་བར་བྱས༎
ཆེར་ཁྲོས་སྦྲུལ་གདུག་གནས་པའི་ཁང་ལོགས་སུ༎
ནོར་བུ་རབ་དངས་འོད་སྣང་གསལ་མིན་ལྟར༎
སྐད་གཉིས་སྨྲ་མཁས་དེ་ནི་མདུན་བཞག་ནས༎
གླང་རྫི་ཡོངས་ལ་ཤེས་སམ་བརྡ་སྦྱོར་དྲིས༎
སླད་ནས་མཛངས་གྲུང་ལྡན་པའི་ཁ་ལོ་པས༎
སྙན་ལྗེབས་ཤིང་རྟས་དྲངས་པའི་བཀྲ་ཤིས་ཚིག༎
ལེགས་བསྒྱུར་ངོ་མཚར་དད་པའི་ཤར་རིའི་རྩེར༎
སྨྲ་མཁས་ཉིན་བྱེད་གཞོན་ནུ་གསལ་བར་ཤར༎
པཎྜི་ཏ་དེའི་ཡིད་ཀྱི་པདྨོའི་ཚལ༎
རབ་རྒྱས་ཕྱུར་མཐོང་ཆེ་དགུའི་བུང་བའི་ཚོགས༎
བདག་ཉིད་ཆེ་དེའི་ཞབས་རྟེན་གདིང་བའི་གོས༎
ལེན་པར་བརྩོན་ལ་གཤོག་རྩེ་གཡོ་བ་འདྲ༎
བསླབ་སྦྱངས་ཡོན་ཏན་རྩི་སྨན་མཆོག་དེ་ཡིས༎
སྡུག་སེམས་སྡང་བའི་ཟུག་རྔུའི་ཚོགས་བཀྲུས་ནས༎
ཡིད་ངོར་མཛེས་པའི་མིག་ཟུར་དཀྱུས་རིང་དག༎
སྙིང་ནས་ཆགས་པས་ཡུན་དུ་བལྟ་བར་བྱས༎