[A:114]གནང་ཞིག་ཐུགས་ལ་འདོགས་པར་ཞུ་ཞུས་པས།
ལྕགས་ཐབ་ཆུ་འཛིན་སྔོན་པོའི་སྤྲིན་རུམ་ན༎
ཙན་དན་མེ་ལྕེ་དམར་པོ་གློག་ལྟར་འཁྱུག༎
འུར་དིང་འབྲུག་གི་བུ་མོ་ངར་སྒྲ་འབྱིན༎
གན་གར་འཁོར་ཡུག་ཡངས་པའི་གནས་མཆོག་འདིར༎
རི་ཤིང་བདུད་རྩིའི་ཆར་རྒྱུན་ལེགས་ཕབ་པའི༎
དང་པོའི་ཕུད་དེ་ཏཱ་ར་ཉིད་ལ་འབུལ༎
དེ་ནས་རང་གི་མགྲིན་པའི་ལམ་དུ་མྱངས༎
ད་ལྟའི་དུས་ན་ལེགས་བཤད་ཀུན་འཕེལ་ཞིང༎
ན་ཆུང་རྐྱང་ཟིའི་བུ་མོ་སྐྱེངས་ཏེ་ཐལ༎
ཞེས་གསུང་ཞེས་གཏམ་དུ་སྒྲོག་གོ༎
འདི་དུས་དྲུང་ཆེན་སངས་རྒྱས་སེང་གེ་བ་གནས་སྒོའི་ཁམས་པ་གནས་སྐོར་བ་འགའ་དང་བཅས་གངས་རི་མཚོ་གསུམ་སྐོར་ནས་ཕྱིར་འོངས་པ་དང་མར་ལམ་རྣམ་རྒྱལ་ཆོས་སྡེར་མཇལ། དེ་ཕྱིན་འཕགས་པ་ཀུན་དགའ་བོ་བཞིན་བླ་མ་མཆོག་དེའི་རིམ་གྲོ་པར་བཞུགས་སོ༎
དེར་པཎ་ཆེན་རིན་པོ་ཆེ་ཉིད་ཀྱིས་ཚད་མའི་མཐའ་གཅོད་ཆེན་མོའི་ཐུགས་རྩོམ་གནང་ཞིང། སྦྱིན་པའི་བདག་པོ་ལ་བཀའ་བསྒོས་ནས། ཕར་ཚད་སོགས་གཞུང་ཆེན་རྣམས་པར་དུ་བསྒྲུབས་པའི་པར་ཕུད་ལ། འཇམ་དཔལ་མཚན་བརྗོད་རྒྱ་པར་མ་དང་འགྲན་བཟོད་དེ་བརྐོས་ཤིང། པར་བྱང་རྣམས་ཀྱང་པཎ་ཆེན་རིན་པོ་ཆེའི་ཐུགས་རྩོམ་དུ་གནང་ལ། པར་གྲུབ་ཕྲལ་གཞུང་རྣམས་ཀྱི་ལུང་དང་ལྷན་ཅིག་པར་བྱང་གི་ལུང་ཡང་སྩལ་བས། མངའ་རིས་ན་ལུང་རྒྱུན་བཞུགས་ལ་བཀའ་འབུམ་ན་མཚུང་སྣང་ངོ༎
དེར་བདག་མེད་རྟོགས་པའི་ཏིང་ངེ་འཛིན་ཁྱད་པར་ཅན་ཐུགས་རྒྱུད་ལ་འཁྲུངས། རྨ་བྱ་བྱང་བརྩོན་གྱིས་མཛད་པའི་དབུ་མའི་སྟོང་ཐུན་གཟིགས་པའི་མོད་ལ་སྔོན་གྱི་གནས་རྗེས་སུ་དགོངས་ཤིང། བཅོམ་ལྡན་འདས་འཇམ་པའི་རྡོ་རྗེ་དཀར་པོའི་ཞལ་འཛུམ་ལྷག་པར་གསལ་བར་གཟིགས་པས། དེ་ཕྱིན་འཇམ་དཔལ་དགེས་པའི་བཤེས་གཉེན་ཞེས་མཚན་ཟུར་ལ་འདོགས་པ་གནང་ཞིང། སྔོན་རྣམ་རྒྱལ་ཆོས་སྡེར་བཞུགས་