[A:65]འོང་ཞིང་རིན་གཞལ་དཀའ་བ་དག་ཀྱང་རྡོས་ཕངས་པ་མེད་པར་ཆམ་ཆོས་དུ་བརྡུངས་ནས་སྤོས་དུད་སྦྱངས་ཏེ་དད་པའི་མིག་ཆུའི་ཡོན་ཆབ་ཀྱིས་བཞིན་རས་ཀྱི་མེ་ཏོག་བརྒྱན་པར་བྱས་ནས་འདུས་པའི་ཚོགས་དེ་དག་ལ་གུས་པར་བསྟབས་སོ༎
དེར་ཡོངས་པའི་དགེ་བའི་ལས་ཅན་དེ་དག་སླར་རང་ཡུལ་དུ་ལམ་གྱི་འཇིགས་པ་གང་གིས་ཀྱང་མ་རེག་པར་སོན་པར་གྱུར་ཚེ། དངོས་གནས་ཀྱི་ཚུལ་དེ་དག་རྒྱ་ཆེར་སྒྲོག་ཅིང། ལྷག་པར་སྙན་ངག་གི་ཚིག་འབྲུ་གསར་པའི་ཡི་གེ་དག། གློ་བོ་སྡེ་པ་ཚངས་ཆེན་བཀྲ་ཤིས་མགོན་པོའི་སྤྱན་ལམ་དུ་ཕེབས་པས་དགེས་པ་རབ་དང་མཆོག་གི་རྩེར་བྱོན་ཞེས་གྲགས་ཤིང། དེ་དུས་ཀྱི་སྙན་ངག་གི་ཚིག་སྡེབས་ལེགས་སུ་བསྒྲིགས་པའི་ཆ་ཙམ་ཞིག་བརྗོད་ན།
འཛམ་བུའི་སྒྲ་ཡིས་མཚོན་པ་ཡི༎
ཞིང་འདི་མཛེས་པའི་རྒྱན་དྲུག་དང༎
སྤྱོད་པའི་བརྟུལ་ཞུགས་གྲུབ་པ་ཡིས༎
འཕགས་ཡུལ་བདུད་རྩིའི་ལམ་ཆེན་གཏོད༎
ཅེས་རྒྱ་གར་དུ་དམ་པའི་ཆོས་རྒྱས་ཤིང་དར་ཚུལ།
རྨོངས་པའི་ཁང་བུར་ཡུན་རིང་དུ༎
མི་ཤེས་ནད་ཀྱིས་གཟིར་བ་ཡི༎
གངས་ཁྲོད་མུན་པའི་སྣག་རུམ་འདིར༎
ལོ་པཎ་ཆོས་ཀྱི་ཉི་མས་བསྐྱངས༎
ཞེས་བོད་ཡུལ་དུ་སངས་རྒྱས་ཀྱི་བསྟན་པ་རིན་པོ་ཆེ་འཕེལ་ཚུལ།
སྨོན་ལམ་གྲུབ་པའི་རྒྱལ་སྲས་ནི༎
པདྨོ་ཅན་དང་འཇམ་དབྱངས་དང༎
ཀུན་གྱི་ཡབ་གྱུར་ཀུན་བཟང་གིས༎
འགྲོ་འདིའི་བདེ་སྐྱིད་ཡུན་རིངས་བཟུང༎
ཞེས་ཆོས་རྒྱལ་མེས་དབོན་རྣམ་གསུམ་གྱི་སྐུ་རིང་ལ་བསྟན་པ་སྔ་དར་གྱི་བྱུང་ཚུལ།
མདའ་ལྔ་ལྡན་པའི་སྙིང་སྟོབས་ཀྱིས༎
འབྱུང་པོའི་དཔུང་ཚོགས་ཀུན་བསྡུས་ནས༎
དུས་མཐར་རྒྱལ་ངན་གླང་ཆེན་གྱིས༎
རྨོངས་པའི་དུག་གིས་ཉེར་གཙེས་མོད༎
ཅེས་གླང་དར་གྱིས་བསྟན་པ་བསྣུབས་ཚུལ།
དེ་ཚེ་དེར་ཡང་དགེ་བློ་ཅན༎
སེམས་དཔའ་སྙིང་སྟོབས་ཆེན་པོས་ནི༎
མཐུ་སྟོབས་