[A:469]བསྟན་པ་འཛིན་པའི་བཤེས་གཉེན་ཇི་ཙམ་བྱུང་བ་དང། བཤད་རྒྱུད་འཛིན་པའི་ཆོས་ཀྱི་གྲྭ་ཇི་ཙམ་ཚུགས་པ་དག་མདོར་བསྡུས་པ་བརྗོད་པ་ནི། རྗེ་བཙུན་གོང་མ་གསུམ་གྱི་བྱིན་རླབས་དང། ཆོས་རྗེ་ཁུ་དབོན་གྱིས་མཛད་པའི་རྣམ་པར་ཐར་པ་ལས་འཁྲུངས་པ་ནི། ཤོང་སྟོན་རྡོ་རྗེ་རྒྱལ་མཚན་སྐུ་མཆེད་དང། དཔང་ལོ་ཙཱ་བ་བློ་གྲོས་བརྟན་པ་ཞང་དབོན་གསེར་རིའི་ཕྲེང་བ་ལྟར་རྒྱུད་མར་བྱོན་པ་རྣམས་དང། ཀུན་མཁྱེན་དོལ་པོ་བ། མ་ཏི་པཎ་ཆེན། ཇོ་ནང་ཕྱོགས་ལས་རྣམ་རྒྱལ་སོགས་མུ་ཏིག་གི་ཕྲེང་བ་ལྟར་བྱོན་པ་རྣམས་ནི་མཚོན་པ་ཙམ་དང། ཁྱད་པར་སྡེ་སྣོད་དང་རྣམ་འགྲེལ་གྱི་བཤད་རྒྱུན་འཛིན་པ་ལ། འུ་ཡུག་པས་རྣམ་བཤད་རིགས་མཛོད་དང། བསྡུས་པ་རིགས་སྒྲུབ་མཛད། རྣམ་འགྲེལ་ལུགས་ཀྱི་རྣམ་བཤད་ཀྱི་ཐོག་མ་ཡིན་པར་གྲགས། ཏེ་ར་པ་བྱམས་མགོན་དང། ལྡོང་སྟོན་ཤེས་རབ་དཔལ་དང། དཀར་ཤཱཀྱ་གྲགས་དང། ཤར་པ་ཤེས་རབ་འབྱུང་གནས། ནགས་ཕུག་པ་ཤེས་རབ་འོད་ཟེར་དང། ལྷོ་པ་ཀུན་མཁྱེན་ལ་སོགས་དངོས་ཀྱི་སློབ་མ་རྣམ་འགྲེལ་མཁས་པར་མཁྱེན་པ་དག་ཡིན་ཞེས་གྲགས་ལ། ཕྱིས་ནི་རྒྱ་ནོར་བྱ་གསུམ་དང། ཉ་དར་མ་རིན་ཆེན། ཉ་དབོན་པོ་ཀུན་དགའ་དཔལ། མཁས་པའི་དབང་པོ་གཡག་གཞོན་གཉིས་རྣམས་ཏེ། ཉི་ཟླ་ལྟར་གྲགས་པ་བྱོན་པ་རྣམས་ནི་མཚོན་པ་ཙམ་མོ།
རྣམ་འགྲེལ་གྱི་རྣམ་བཤད་ས་ལུགས་དང་བསྡུས་པ་རིགས་གཏེར་ལྟར་འཛིན་པའི་བཤད་གྲྭ་ཚུགས་པ་ནི། དཔང་ལོ་ཆེན་པོས་བོ་དོང་ཨེར། རྣམ་འགྲེལ་དང། མངོན་པ་ཀུན་ལས་བཏུས་ཀྱི་བཤད་གྲྭ་བཙུགས། དཔོན་ཆེན་བྱང་པས་ངམ་རིངས་ཀྱི་ཆོས་གྲྭ་དང། ཀུན་སྤངས་ཆོས་གྲགས་དཔལ་བཟང་གི་བཟང་ལྡན་དང། སི་ཏུ་ཆོས་རིན་དཔལ་གྱིས་ཤེལ་དཀར་གྱི་ཆོས་སྡེ་དང། ཏའི་སི་ཏུ་བྱང་ཆུབ་རྒྱལ་མཚན་གྱིས་དཔལ་རྩེས་