[A:464]རྣམ་བཞག་དང་ཐ་སྙད་ཇི་ལྟར་བྱུང་བའི་ཚུལ་ནི། སྤྱིར་འཛམ་བུ་གླིང་དུ་བསྟན་པ་ལ་འཕེལ་འགྲིབ་བྱུང་བའི་ཚེ་འཕགས་པའི་གནས་བརྟན་བཅུ་དྲུག་མྱ་ངན་ལས་འདའ་བའི་ཚུལ་མི་སྟོན་པར་ཡུལ་སོ་སོ་ན་བཞུགས་པ་ལས། གང་སྐབས་སུ་བབ་པའི་ཕྱོགས་དང་གནས་དེར་དངོས་སམ་སྤྲུལ་པ་བྱོན་ནས། གང་ཉམས་ཆུང་བར་གྱུར་པའི་བསྟན་པ་དེ་བསྡུད་པ་དང། འཛིན་པ་དང། ཉེས་པ་སུན་འབྱིན་པར། གནས་བརྟན་གྱི་བྱུང་ཁུངས་བརྗོད་པའི་མདོ་ལས་གསུངས་པ་དེའི་ཕྱིར་བསྟན་པ་རིན་པོ་ཆེ་འཕེལ་འགྲིབ་དང་འཇིག་རྟེན་གྱི་ཁམས་མ་རུངས་པ་དག་ཏུ་གྱུར་པ་ན། གནས་བརྟན་ཆེན་པོ་བཅུ་དྲུག་ལ་གསོལ་བ་བཏབ་ཅིང་ཐུགས་དམ་བསྐུལ་བ་དང། འཇིག་རྟེན་སྐྱོང་བ་བཞི་ལ་མཆོད་པ་དང་གཏོར་མ་ཕུལ་ནས་སྔོན་གྱི་དམ་བཅའ་མ་བསྙེལ་བར་བསྐུལ་བ་ནི༎ གང་ཉམས་ཆུང་བའི་བསྟན་པ་དེ་མྱུར་དུ་འཕེལ་བ་དང། འཇིག་རྟེན་གྱི་ཁམས་སུ་དགེ་ལེགས་རྒྱུན་མི་འཆད་པའི་ཐབས་ལ་མཁས་པའོ༎
དེ་ཡང་ཐོག་མར་ལོ་ཙཱ་བ་ཆེན་པོས་མདོ་སྔགས་ཀྱི་ཆོས་མང་དུ་བསྒྱུར། སྔགས་ལོག་སུན་འབྱིན་གྱི་བསྟན་བཅོས་མཛད། ལྷ་བླ་མ་དང་ཕོ་བྲང་ཞི་བ་འོད་ཀྱིས་སྔགས་པ་ལ་ཆོས་དག་མ་དག་གི་དབྱེ་བ་འབྱེད་པའི་བཀའ་ཤོག་བརྫངས། དེ་དག་གི་སྐབས་སུ་བསྟན་པ་འཕེལ་བའི་དགའ་སྟོན་ལ་དགེ་འདུན་གྱི་འདུ་བ་རྒྱ་ཆེན་པོ་རྩེ་སྡེ་ཞེས་ཀྱང་བྱ། དབང་ལྡེ་ཞེས་ཀྱང་བྱ་བ་དེས་མཛད། དུས་དེར་རྔོག་ལོ་ཙཱ་བ་དང། བཙན་ཁ་བོ་ཆེ་ཡང་བྱོན། ཆོས་ཀྱི་བགྲོ་བ་མང་དུ་མཛད། བསྟན་པའི་གནས་ཚད་དང། འདས་ལོ་དང་འབྱུང་འགྱུར་གྱི་ཚད་རྣམས་ཡི་གེར་བཀོད་དོ༎
ཞེས་གྲགས་ཤིང། དེ་དང་དུས་མཚུངས་པར་མགོས་ལྷ་བཙས་ཀྱིས་ཆོས་ལ་དག་གཏེར་གྱི་འཇམ་ཡིག་ཆེ་ཆུང་དང། གསང་བ་འདུས་པའི་སྟོང་ཐུན་ལ་སོགས་པའི་བསྟན་བཅོས་མང་དུ་མཛད།