[A:463]གི་ཐ་སྙད་བྱུང། བོད་ཀྱི་མཁན་པོས་བསྟན་བཅོས་མཛད་པའི་ཐོག་མ་ནི། ལོ་ཙཱ་བ་ཡེ་ཤེས་སྡེས་ལྟ་བའི་ཤན་འབྱེད་དང། ལོ་ཆེན་གྱི་སྔགས་ལོག་སུན་འབྱིན་འདི་ཡིན་པར་གྲགས་ལ། ཕྱིས་ནི་ཤིན་ཏུ་མང་ངོ༎
ལོ་ཆེན་གྱིས་རང་ལོ་བརྒྱད་ཅུ་རྩ་ལྔ་པ་ལ་ལྷ་བླ་མ་ཁུ་དབོན་གྱིས་ཇོ་བོ་ཨ་ཏི་ཤ་བོད་དུ་སྤྱན་དྲངས། བྱང་ཆུབ་ཀྱི་སེམས་སྦྱོང་བའི་རིམ་པ་དང། སྣོད་ལྡན་འགའ་ཞིག་ལ་རྡོ་རྗེ་ཐེག་པའི་ཆོས་གསུངས། ཐུགས་རྗེ་དང་སྨོན་ལམ་གྱི་ཤུགས་ཀྱིས་བསྟན་པའི་སྒོ་རང་གི་ངང་གིས་ཕྱེ། དེ་ནས་བཤེས་གཉེན་པོ་ཏོ་བས་བྱང་ཆུབ་སེམས་དཔའི་སྡེ་སྣོད་ལ་བཤད་ཉན་གྱི་སྒོ་རྒྱས་པར་ཕྱེ། དེ་ནས་བཟུང་སྟེ་དེང་སང་གི་བར་དུ་བྱང་ཆུབ་སེམས་དཔའི་སྡེ་སྣོད་ཀྱི་ཉན་བཤད་ལ་བར་ཆད་མེད་དོ༎
ཨ་ཏི་ཤའི་སློབ་མ་རྔོག་ལེགས་པའི་ཤེས་རབ་ནི་མདོ་སྨད་དུ་སྡོམ་པ་བླངས་པའི་དབུས་མི་ལྔའི་འབྲིང་ཡེ་ཤེས་ཡོན་ཏན་ལས་རབ་ཏུ་བྱུང་བ་ཡིན་ནོ༎
ཇོ་བོས་ལུང་བསྟན་ནས་ནེའུ་ཐོག་གི་གཙུག་ལག་ཁང་བཞེངས། དེའི་དབོན་པོ་རྔོག་བློ་ལྡན་ཤེས་རབ་ནི། འཇམ་དཔལ་རྩ་རྒྱུད་ལས་ལུང་བསྟན་བརྙེས། རྒྱ་གར་ཤར་ནུབ་ཏུ་བསླབ་སྦྱངས་མཐར་ཕྱིན། བོད་ཡུལ་དུ་བྱམས་པའི་ཆོས་དང་ཚད་མ་སྡེ་བདུན། དབུ་མ་རང་རྒྱུད་ཤར་གསུམ་ལ་སོགས་པའི་བཤད་ཉན་གྱི་དབུ་གཙུགས་བསྟན་བཅོས་དུ་མ་མཛད། དེ་ནས་བཟུང་སྟེ་དེང་སང་གི་བར་ལོ་བཞི་བརྒྱ་བཞི་བཅུ་ཙམ་ལུང་རིགས་ཀྱི་བཤད་ཉན་ལ་བར་ཆད་མེད་དོ༎
དེ་ལྟར་སོ་ཐར་སྡོམ་པའི་བཤད་བཀའ་ཆད་པ་གསོ་བ་དང། སྡེ་སྣོད་དང་གསང་སྔགས་ཀྱི་ཆོས་གསར་དུ་བསྒྱུར་ཞིང། ཨ་ཏི་ཤ་སྤྱན་དྲངས་པ་དང། དེ་ནས་ལུང་རིགས་ཀྱི་བཤད་ཉན་རྒྱུན་མ་ཆད་པར་དར་བ་སྟེ་བསྟན་པ་ཕྱི་དར་གྱི་ཚུལ་ལ་ཆོས་ཀྱི་འཁོར་ལོ་བསྐོར་བའི་རིམ་པ་གསུམ་མོ༎
ཁྱད་པར་དབུས་གཙང་དུ་ཆོས་འཁོར་གྱི་