[A:464]rnam bzhag dang tha snyad ji ltar byung ba'i tshul ni/ spyir 'dzam bu gling du bstan pa la 'phel 'grib byung ba'i tshe 'phags pa'i gnas brtan bcu drug mya ngan las 'da' ba'i tshul mi ston par yul so so na bzhugs pa las/ gang skabs su bab pa'i phyogs dang gnas der dngos sam sprul pa byon nas/ gang nyams chung bar gyur pa'i bstan pa de bsdud pa dang/ 'dzin pa dang/ nyes pa sun 'byin par/ gnas brtan gyi byung khungs brjod pa'i mdo las gsungs pa de'i phyir bstan pa rin po che 'phel 'grib dang 'jig rten gyi khams ma rungs pa dag tu gyur pa na/ gnas brtan chen po bcu drug la gsol ba btab cing thugs dam bskul ba dang/ 'jig rten skyong ba bzhi la mchod pa dang gtor ma phul nas sngon gyi dam bca' ma bsnyel bar bskul ba ni// gang nyams chung ba'i bstan pa de myur du 'phel ba dang/ 'jig rten gyi khams su dge legs rgyun mi 'chad pa'i thabs la mkhas pa'o//
de yang thog mar lo tsA ba chen pos mdo sngags kyi chos mang du bsgyur/ sngags log sun 'byin gyi bstan bcos mdzad/ lha bla ma dang pho brang zhi ba 'od kyis sngags pa la chos dag ma dag gi dbye ba 'byed pa'i bka' shog brdzangs/ de dag gi skabs su bstan pa 'phel ba'i dga' ston la dge 'dun gyi 'du ba rgya chen po rtse sde zhes kyang bya/ dbang lde zhes kyang bya ba des mdzad/ dus der rngog lo tsA ba dang/ btsan kha bo che yang byon/ chos kyi bgro ba mang du mdzad/ bstan pa'i gnas tshad dang/ 'das lo dang 'byung 'gyur gyi tshad rnams yi ger bkod do//
zhes grags shing/ de dang dus mtshungs par mgos lha btsas kyis chos la dag gter gyi 'jam yig che chung dang/ gsang ba 'dus pa'i stong thun la sogs pa'i bstan bcos mang du mdzad/