[A:85a]mos gus gyis gsungs te/ la stod byang gi mdog stod ros kyi dpal rir sku gshegs so/ /nga'i rus pa 'di pha gi shod kyi steng der sregs shig nga'i bu tsha brgyud kyis rgyal khams dbang du 'du pa'i rten 'brel yod gsungs nas de bzhin du byas so/ /kha cig na re/ zangs tsha'i yum yul rta re rong / brgyud bzang ba/ pha ming zangs kyi jo sras/ de la sras gcung zangs tsha bsod nams rgyal mtshan 'khrungs pa yin pas chos rje sku mched yum gcig par 'dod pa ni nor ba ste/ chos rje ni zangs tsha ma yin pa'i phyir zer kyang / rje btsun gyis ga ring rgyal po la rtsis bsdur du btang ba'i yi ge las/ yum tha dad ma gsungs pas/ yum gcig pa nyid don la gnas pa yin no/ /bla ma des btsun mo lnga khab tu bzhes pa'i dang po de yul mdog gi tsha sna'i 'dab/ pha ming zur khang gi brgya tsho/ zhang rgyal ba dpal/ ming ma gcig kun skyid/ de la sras gcen 'gro ba'i mgon po chos rgyal 'phags pa/ yab dgung lo nga gnyis bzhes pa shing mo lug gi lo zla ba gsum pa'i tshes drug la g.yas ru ngam ring gi klu khung du sku 'khrungs/ yum gyi lhums su zhugs pa dang bltams pa'i dus su ngo mtshar gyi ltas dang bcas shing / chung ngu nas 'bri klog la sogs pa rig pa'i gnas lnga 'ga' zhig ma bslabs par mkhyen/ 'ga' zhig dka' tshegs med par mkhyen/ sngon gyi gnas dran pa'i mngon shes kyang mnga' ste/ 'di'i snga ma'i skye ba spyan ras gzigs dang gsung gleng mdzad par grags pa'i sa ston ri pa yin zer bas de brtag pa'i phyir du/ sa ston ri