[A:97b]shes kyi ngo bor gyur pa chos kyi rje'i zhabs la gus pas phyag 'tshal lo/ /lhag pa'i bsam pa rnam par dag pa'i mthus 'phrin du zhu ba'i yi ge 'di bri bar bya'o/ /bsod nams dang ye shes kyi tshogs phul du byung ba bsags pas che ba'i yon tan bdun gyi khyad par 'phags pa'i rten rnam par dag par sku 'khrungs nas/ sngon gyi smon lam las grub pa'i mthus bslab pa gsum gyi lus yongs su rdzogs pas yang dag pa'i bla ma rgya mtsho'i gling du blo gros mi zad pa'i gru bo cher brtson pa'i ded dpon gyis brtan par bzhugs nas legs par dpyad pa'i nor bu'i tshogs yang dag par blang ste/ yon tan rin po che'i rgyan gyis spras pas mkhas pa skye bo'i tshogs zil gyis mnan nas/ de dag gi yid rab tu 'phrog par mdzad pa'i skyes bu chen po/ lha dang bcas pa'i 'jig rten gyi ston pa grags pa seng ge'i spyan sngar/ shAkya'i dge tshul rdo rje 'dzin pa blo gros rgyal mtshan dpal bzang pos mngon pa'i nga rgyal spangs te gus pa'i yid kyis gsol pa/ 'dir bla ma chos kyi rje dmigs pa med pa'i thugs rje dang mkhyen rab tu ldan pa de'ang 'jig rten gyi khams gzhan du sems can gyi don rgya che ba la gzigs nas de bzhin gshegs pa dri ma med pa'i dpal zhes bya bar mngon par rdzogs pa 'tshang rgya bar zhal gyis bzhes te rnam par sprul pa bsam gyis mi khyab pa'i cho 'phrul gyis yongs su mya ngan las 'das pa'i tshul bstan to/ /'on kyang chos kyi rje nyid kyi zhal gyis da dung khyed rnams gang gi sgo nas kyang legs par 'ong zhes bka' gnang ba dang / rgyal po so zin rgyal khams bde bar yod/ skabs