[A:98a]don la da res rgyal pos thugs la btags nas bande dang / bon po la sogs pa bla mchod pa thams cad la dmag khral med par bde bar sdod/ de'i mgo gnyer dang bande thams cad sa skya pa shes su chug gsungs pa'i lung byon/ de'i 'ja' sa skyel ba dang / mi brtsi ba dang / slob dpon pa gdan 'dren pa'i don sdom la 'brug mngags pa yin/ 'dir chos kyi rje bzhugs pa'i tshe na'ang rgyal bu'i drung du yang 'byon dgos pa dang / 'phral gyi bsod nams kyi g.yeng bas nged rang gi yid tshim pa'i chos kyi bshad nyan gyi long ma byung bas khyed la chos kyi lung mang du len pa dang / bsnyen rdzogs kyi mkhan slob kyi ya ba zhu ba'i don du spyan 'dren pa'i gros byas pas/ chos rje pas kyang de 'thad gsungs nas bka' yig kyang bskur/ nged kyis kyang zhu yig nan can bskur ba yin pa la byon ma nyan/ chos rje pa zhal bzhugs pa'i tshe byon na chos rje pa'ang mnyes par 'dug
gal te sku gshegs na'ang khyed bzhugs na blo bde snyam nas gdan drangs pa la rkyen ci yin ma shes khyed ma byon pa de yin/ de la cung zad nged kyang yid chad par gyur/
da dung yang chos kyi rje ni mi bzhugs/ gzhan slob dpon med pas khyed la re zhing mchis/ 'dul ba/ phar phyin/ tshad ma la sogs pa'i lung mang du len pa dang / chos rje pa nyid sku gshegs khar khyed dge slong cig ma grub pa de blo ma bde/ gzhan blo mi bde ba mi snang gsungs/ der nged spyan snga na yod pa rnams kyis de skad mi gsung bar yun ring du bzhugs pa'i rten 'brel zhig bsgrig par zhu byas pas/ de shin tu