[A:124b]tshal la zla ba'i 'od zer shar ba ltar ches cher gsal bar mdzad do/ /de nas lo de'i phyi lo dpon chen shAkya bzang pos lha khang chen mo'i 'gram bting / de'i las la khri skor bcu gsum bskul te dpon chen kun dga' bzang po dang sbrel nas yongs su rdzogs par grub cing / gzhan yang rin chen sgang bla brang / lha khang bla brang / dus mchod bla brang rnams kyang bzhengs/ de nas bla chen 'di nyid gong du phebs nas dgung lo so drug pa lcags pho rta la rgyal pos slar yang dbang bskur zhus pa'i tshe/ mi nyag rgya rgod rgyal po'i shel dam la bcos byas nas shel dam gling drug ma dang / 'ja' sa khyad par can phul te/ gnam gyi 'og sa'i steng na rgya gar lha'i sras po/ sprul pa'i sangs rgyas/ yi ge rtsom mi/ rgyal khams 'jigs su 'jug pa po/ gnas lnga rig pa'i paNDi ta 'phags pa ti shrI zhes pa'i mtshan gsol/ zang zing gi 'bul ba yang dngul bre chen stong ra can/ gos dar lnga khri dgu stong la sogs pa dang / mjal res kyis mthong phyag dang mjal dar dngul bre chag med sogs mdzad pas/ rgyal po'i 'phral gyi 'bul ba kun dril bas gser bre brgya lhag pa dang / dngul bre stong ra can/ gos dar bzhi khri la sogs pa byung bar grags shing / de ltar hor gyi rgyal khams kyi 'gro ba ma lus pa theg pa chen po la bkod de/ bde bar gshegs pa'i bstan pa rin po che nyin byed kyi snang ba ltar ches cher gsal bar mdzad nas/ de nas slar bod yul la myur du phebs par zhal gyis bzhes te dgongs pa gtad nas/ rgyal po 'khor dang bcas pa la myur du phyir phebs